កំពង់ស្ពឺ ៖ មានករណីគ្រោះថ្នាក់ចរាចរណ៍ កើតឡើងនៅលេីកំណាត់ផ្លូវជាតិលេខ៤ ចន្លោះគីឡូម៉ែត្រ១០៣-១០៤ រថយន្តបុករះពីក្រោយរថយន្តឈប់រង់ចាំការបញ្ជាចរាចរណ៍ ៩គ្រឿង នៅចំណុចក្បែរចំណោទ លោកយាយម៉ៅពេជ្រនិល ក្នុងភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ ថ្ងៃទី០៦ ខែមិថុនា ឆ្នាំ២០២៣ វេលាម៉ោង២និង២០នាទីរសៀល បណ្តាលឱ្យមនុស្សបាត់បង់ជីវិតម្នាក់, របួសធ្ងន់០២ នាក់ និង ខូចខាតរថយន្ត៩គ្រឿង ។
សមត្ថកិច្ចបានឱ្យដឹងថា មុនកេីតហេតុមានរថយន្ដមួយគ្រឿង ម៉ាកFREIGHT LINCER ពណ៌ស ពាក់ស្លាកលេភ្នំពេញ3D-0827 សណ្តោងរ៉ឺម៉ក ពាក់ស្លាកលេខភ្នំពេញ4A-5446 បានបេីកមកបុករះរថយន្ដជាច្រេីនគ្រឿងដែលឈប់ចតរង់ចាំការសម្រួលចរាចរណ៍ក្នុងខណៈពេលក្រុមការងារជួសជុលស្ថាបនាផ្លូវជាតិលេខ៤ កំពុងតែបញ្ជាចរាចរណ៍ជូនអ្នកដំណេីរតាមផ្លូវជាតិលេខ៤ បានទៅមកម្ដងម្ខាង។
ក្រោយបង្កគ្រោះថ្នាក់អ្នកបេីកបររថយន្ដបានគេចខ្លួន ហើយបច្ចុប្បន្នកម្លាំងនគរបាល បានធ្វេីការស្រាវជ្រាវស្វែងរកម្ចាស់ក្រុមហ៊ុននិងអ្នកទទួលខុសត្រូវដេីម្បីធ្វេីការ តាមនីតិវិធី ហើយរថយន្ដដែលរងគ្រោះធ្ងន់ធ្ងរមានចំនួន ៣គ្រឿង រថយន្ដដែលរងគ្រោះតិចតួចស្រាលៗ ម្ចាស់បានយកទៅជួសជុលដោយខ្លួនឯង។ ចំណែកសពនិងអ្នករងរបួសក្នុងហេតុការណ៍ខាងលេីបានប្រគល់ជូនក្រុមគ្រួសារនិងបញ្ជូនទៅសង្រ្គោះព្យាបាលនៅមន្ទីរពេទ្យខេត្ដកំពង់ស្ពឺ ។
បន្ទាប់មកកម្លាំងនគរបាលចរាចរណ៍ ស្រុកភ្នំស្រួច បានយកវត្ថុតាងមធ្យោបាយបង្កមករក្សាទុកនៅ អធិការដ្ឋាននគរបាលស្រុកភ្នំស្រួច ដេីម្បីចំណាត់ការកសាងសំណុំរឿងតាមនីតិវិធី៕(ដោយ សំណាង៩៦)