បរទេស ៖ រដ្ឋាភិបាលថ្មីរបស់ថៃ កាលពីថ្ងៃពុធម្សិលមិញ បានអនុម័តវិធានការផ្តល់ការចូលបណ្តោះអាសន្នដោយគ្មានទិដ្ឋាការដល់ភ្ញៀវទេសចរចិន ដែលជាសញ្ញាថា«ការស្ទុះងើបឡើងវិញនៃឧស្សាហកម្មទេសចរណ៍របស់ប្រទេសគឺជាអាទិភាពសេដ្ឋកិច្ចកំពូល»។
លោក ស្រេតថា ថាវីស៊ីន (Srettha Thavisin) នាយករដ្ឋមន្ត្រីថៃ បាននិយាយថា «ការលើកលែងទិដ្ឋាការ ដែលនឹងអនុវត្តផងដែរចំពោះភ្ញៀវមកពីប្រទេសអាស៊ីកណ្តាល កាហ្សាក់ស្ថាន នឹងចូលជាធរមានចាប់ពីថ្ងៃទី ២៥ ខែកញ្ញារហូតដល់ថ្ងៃទី ២៩ ខែកុម្ភៈ ឆ្នាំក្រោយ»។
លោកបន្តថា «អាជ្ញាធរពាក់ព័ន្ធត្រូវបានប្រឹក្សាដើម្បីធានាថាពួកគេបានត្រៀមខ្លួនជាស្រេចក្នុងការដោះស្រាយការកើនឡើងដែលរំពឹងទុកសម្រាប់អ្នកធ្វើដំណើរ»។
ប្រទេសចិន កាលពីជាងមួយទស្សវត្សរ៍មុនបានក្លាយជាប្រភពទេសចរណ៍ដ៏សំខាន់មកកាន់ប្រទេសថៃ ដោយមានអ្នកទេសចរជិត ១១ លាននាក់ក្នុងឆ្នាំ ២០១៩ ស្មើនឹង ២៧,៦% នៃការមកដល់ទាំងអស់សម្រាប់ឆ្នាំនោះ មុនពេលជំងឺរាតត្បាតកូវីដបានបំផ្លិចបំផ្លាញទីផ្សារទេសចរណ៍។
រាជរដ្ឋាភិបាលថៃ បានស្នើវិធានការនេះដោយសារក្តីបារម្ភថា«ចំនួនភ្ញៀវទេសចរចិននៅឆ្នាំនេះអាចនឹងមិនដល់គោលដៅដំបូងចំនួន ៥ លាននាក់ដោយសារលក្ខខណ្ឌតម្រូវការទិដ្ឋាការតឹងរ៉ឹង»។ ចំណែកអាជ្ញាធរទេសចរណ៍ថៃបានរាយការណ៍ថា «ភ្ញៀវទេសចរចិនប្រហែល ១,៤ លាននាក់ បានមកក្នុងរយៈពេលប្រាំមួយខែដំបូងនៃឆ្នាំនេះ»។
សេដ្ឋកិច្ចរបស់ថៃបានធ្លាក់ចុះក្នុងអំឡុងជំងឺរាតត្បាត ព្រោះឧស្សាហកម្មទេសចរណ៍ដ៏ធំរបស់ខ្លួនបានដួលរលំ។ប្រទេសនេះទទួលបានភ្ញៀវអន្តរជាតិប្រហែល ៤០ លាននាក់ក្នុងឆ្នាំ ២០១៩ ដែលរដ្ឋាភិបាលថៃបានប៉ាន់ប្រមាណថា«អាចរកចំណូលបាន ១,៩ ទ្រីលានបាត (៥៣,២ ពាន់លានដុល្លារ) ជាចំនួនមួយដែលបានធ្លាក់ចុះជាង ៩៩% ក្នុងឆ្នាំ២០២១ នេះបើយោងតាមទិន្នន័យពីក្រសួងទេសចរណ៍និងកីឡា»។
លោក ឆាយ វ៉ាឆារ៉ុនកេ (Chai Wacharonke) អ្នកនាំពាក្យការិយាល័យនាយករដ្ឋមន្ត្រីបាននិយាយថា ប្រទេសថៃបានទទួលភ្ញៀវអន្តរជាតិចំនួន ១៥ លាននាក់ក្នុងរយៈពេល ៧ ខែដំបូងនៃឆ្នាំនេះ។ លោកបាននិយាយថា រដ្ឋាភិបាលមានគោលបំណងទាក់ទាញភ្ញៀវអន្តរជាតិចំនួន ២៨ លាននាក់ និង បង្កើតប្រាក់ចំណូលពីទេសចរណ៍ចំនួន ១,៤ ទ្រីលានបាតក្នុងឆ្នាំ ២០២៣។
ក្រៅពីការលើកលែងទិដ្ឋាការ វិធានការផ្សេងទៀតដែលគណៈរដ្ឋមន្ត្រីបានអនុម័តរួមមាន ការកាត់បន្ថយថ្លៃអគ្គិសនីនិងតម្លៃប្រេងម៉ាស៊ូត ក៏ដូចជាកម្មវិធីបន្ធូរបន្ថយបំណុលរយៈពេលបីឆ្នាំសម្រាប់កសិករ ដើម្បីដោះស្រាយថ្លៃចំណាយរស់នៅខ្ពស់និងបញ្ហាសេដ្ឋកិច្ចផ្សេងទៀត៕ (ប្រែសម្រួលដោយ លោកសំណាង)
