បរទេស ៖ លោក ឌីមីទ្រី ម៉េតវេដេវ (Dmitry Medvedev) អតីតប្រធានាធិបតីរុស្ស៊ី បច្ចុប្បន្នជាអនុលេខាក្រុមប្រឹក្សាសន្តិសុខដ៏មានឥទ្ធិពលរបស់រុស្ស៊ី ដែលដឹកនាំដោយប្រធានាធិបតី វ៉្លាឌីមៀ ពូទីន បាននិយាយកាលពីល្ងាចថ្ងៃអង្គារថា «ការកើនឡើងនៃជំនួយយោធាដល់អ៊ុយក្រែន ដោយសម្ពន្ធមិត្តណាតូ នាំសង្គ្រាមលោកលើកទីបីមកកាន់តែកៀក»។
នៅថ្ងៃដំបូង ការធ្វើអត្ថាធិប្បាយក្នុងនៃកិច្ចប្រជុំកំពូលរបស់សម្ពន្ធមិត្តដឹកនាំដោយសហរដ្ឋអាមេរិកនៅក្នុងប្រទេសលីទុយអានី កន្លែងដែលប្រទេសមួយចំនួនបានសន្យាផ្តល់ជំនួយផ្នែកសព្វាវុធនិងហិរញ្ញវត្ថុបន្ថែមទៀតនោះ ,លោកម៉េតវេដេវបាននិយាយថា «ជំនួយនេះនឹងមិនរារាំងរុស្ស៊ីពីការសម្រេចបាននូវគោលដៅរបស់ខ្លួនក្នុងប្រទេសអ៊ុយក្រែននោះឡើយ»។
លោកម៉េតវេដេវ បានសរសេរនៅលើកម្មវិធីផ្ញើសារ Telegram ថា «លោកខាងលិចដ៏ឆ្កួតលីលាទាំងស្រុងនេះមិនអាចដោះស្រាយអ្វីបានទាំងអស់…តាមពិតទៅ វាជាការទាល់ច្រកទៅហើយ។ សង្គ្រាមលោកលើកទី៣ កាន់តែខិតជិតមកដល់ហើយ។ តើទាំងអស់នេះមានន័យយ៉ាងណាសម្រាប់ពួកយើង? អ្វីគ្រប់យ៉ាងគឺជាក់ស្តែង។ កិច្ចប្រតិបត្តិការយោធាពិសេសនឹងបន្តជាមួយនឹងគោលដៅដដែល»។
រុស្ស៊ីបានហៅសកម្មភាពរបស់ខ្លួនក្នុងប្រទេសអ៊ុយក្រែនថាជា «កិច្ចប្រតិបត្តិការយោធាពិសេស»។ ខណៈរដ្ឋាភិបាលក្រុងគៀវនិងសម្ពន្ធមិត្តនិយាយថា «រដ្ឋាភិបាលក្រុងមូស្គូកំពុងធ្វើសង្រ្គាមដោយគ្មានការបង្ករឿង ដើម្បីដណ្តើមយកទឹកដីនិងត្រួតត្រាប្រទេសជិតខាង»។
ចំណែកលោកខាងលិចនិយាយថា «ខ្លួនចង់ជួយអ៊ុយក្រែនឈ្នះសង្រ្គាម ហើយមហាអំណាចលោកខាងលិច បានផ្គត់ផ្គង់សព្វាវុធទំនើបៗ និងគ្រាប់យ៉ាងច្រើនដល់រដ្ឋាភិបាលក្រុងគៀវរួចហើយ»៕(ប្រែសម្រួលដោយ លោកសំណាង)
