ភ្នំពេញ: ដោយមានបទបញ្ជាពីលោកវរសេនីយ៍ឯក ហួរ ម៉េង វ៉ាង កម្លាំងជំនាញ និងកម្លាំងប៉ុស្តិ៍មូលដ្ឋានបានចេញល្បាតព្រមគ្នា ដើម្បីបង្ការនិងបង្ក្រាបបទល្មើសកុំអោយកើតមាន បានប្រទះឃើញជនសង្ស័យ៣នាក់ ជិះម៉ូតូឌុបគ្នា ដោយសង្ស័យបានឃាត់ដើម្បីសួរនាំនឹងឆែកឆេរ ក៏ឃើញដែលកែឆ្នៃ សំរាប់ឆ្កឹះសោរនិងកាច់សោរ.កម៉ូតូ កាលពីវេលាម៉ោង១២និង៥០នាទីយប់រំលងអធ្រាត្រឈានចូលថ្ងៃអង្គារ ទី១ ខែសីហា ឆ្នាំ២០២៣ត្រង់ចំណុចមុខផ្ទះលក់បង្អែម តាមបណ្ដោយផ្លូវ២០០២ ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
តាមប្រភពពីសមត្ថកិច្ចខណ្ឌសែនសុខ បានឲ្យដឹងថានៅមុនពេលកេីតហេតុ កម្លាំងសមត្ថកិច្ចបានធ្វើការជិះម៉ូតូល្បាតក្នុងភូមិសាស្ត្រដេីម្បីកាត់បន្ថយនិងទប់ស្កាត់បទល្មើសផ្សេងៗដែលអាចកេីតឡេីងដោយប្រការណាមួយ។ លុះដល់ចំណុចកេីតហេតុកម្លាំងសមត្ថកិច្ចក៏បានប្រទះឃេីញជនសង្ស័យចំនួនបីនាក់ជិះម៉ូតូមួយគ្រឿងម៉ាក ហុងដាឌ្រីម សេ១២៥ ស៊េរីឆ្នាំ២០២២ ពណ៌ខ្មៅ ពាក់ស្លាកលេខ តាកែវ1AA.7574។ បានជិះឌុបគ្នាតាមបណ្ដោយផ្លូវ២០០២ ក្នុងទឹសដៅពីកើត ទៅលិចដោយក្នុងលក្ខណៈសង្ស័យ។ ហេីយ សមត្ថកិច្ចបានហៅជនសង្ស័យទាំងបីនាក់នោះអោយឈប់ដេីម្បីធ្វើការឆែកឆេរត្រួតពិនិត្យ។ ខណៈពេលនោះជនសង្ស័យម្នាក់ក្នុងចំណោមបក្ខពួកបីនាក់បានដកកាបូបលុយបោះចោល រួចរួចសមត្ថកិច្ចក៏បានរើសយកកាបូបនោះមកឆែកឆេរ ក៏ឃេីញមានឧបករណ៍សម្រាប់ចាក់ សោរក៏ម៉ូតូ និងសម្រាប់ឆ្កឹះសោរមួយកំផ្លេ។ ហេីយសមត្ថកិច្ចក៏បានធ្វើការឃាត់ខ្លួនជនសង្ស័យទាំងបីនាក់នោះភ្លាមៗតែម្ដង។
បច្ចុប្បន្នជនសង្ស័យទាំងបីនាក់រួមទាំងវត្ថុតាងត្រូវបានសមត្ថកិច្ចនាំខ្លួនយកទៅធ្វើការសាកសួរនៅអធិការដ្ឋាននគរបាលខណ្ឌសែនសុខដេីម្បីកសាងសំណុំរឿងចាត់ការទៅតាមនិតិវិធីច្បាប់ជាបន្តទៀត៕ដោយ.ធ្នូជ័យ