ភ្នំពេញ : ដោយអនុវត្តតាមបទបញ្ជារបស់នាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ, អគ្គស្នងការរងទទួលផែន, ប្រធាននាយកដ្ឋានកណ្ដាលនគរបាលយុត្តិធម៌ និងបញ្ជារបស់លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ ព្រមទាំងក្រោមការសម្របសម្រួលពីតំណាងអយ្យការអមសាលាដំបូងរាជធានីភ្នំពេញ។
លោកឧត្តមសេនីយ៍ត្រី ហ៊ុន មុន្នីរ័ត្ន លោកវរសេនីយ៍ឯក ហែម បូណា អនុប្រធាននាយកដ្ឋាន រួមទាំងសហការី និងលោកវរសេនីយ៍ ឡេង ប៊ុនហួ នាយការិយាល័យនគរបាលព្រហ្មទណ្ឌកម្រិតស្រាល នៃនាយកដ្ឋាននគរបាលព្រហ្មទណ្ឌ ដឹកនាំកម្លាំងសហការជាមួយ ស្នងការដ្ឋាននគរបាលរាជធានីភ្នំពេញ ស្រាវជ្រាវ បង្ក្រាបបានជាបន្ដបន្ទាប់ ជនសង្ស័យប្រុសស្រីចំនួន១០នាក់ ក្នុងនោះជនជាតិវៀតណាម៩នាក់ ខ្មែរម្នាក់ ពាក់ព័ន្ធករណីបាញ់ប្រហារបុរសជនជាតិ វៀតណាមម្នាក់ បណ្ដាលឲ្យស្លាប់ទាំងកណ្ដាលថ្ងៃ នៅខណ្ឌបឹងកេងកង ត្រូវបានបញ្ជូនទៅកាន់សាលាដំបូងរាជធានីភ្នំពេញ នៅរសៀលថ្ងៃទី០៣ ខែសីហា ឆ្នាំ២០២៣នេះ។
គួរជម្រាបថា នៅថ្ងៃទី២៩ ខែកក្កដា ឆ្នាំ២០២៣ វេលាម៉ោង០១៖៣០នាទីថ្ងៃត្រង់ មានករណីឃាតកម្មមួយកើតឡើង បង្កដោយជនសង្ស័យមិនស្គាល់អត្តសញ្ញាណ ប្រើប្រាស់រថយន្តមួយគ្រឿង និងម៉ូតូមួយគ្រឿង ប្រដាប់ដោយអាវុធខ្លីចំនួន២ដើម បានធ្វើសកម្មភាពបាញ់ទៅលើជនរងគ្រោះឈ្មោះ ង្វៀន ទុនហ៊ុង អាយុ៣៧ឆ្នាំ ជនជាតិវៀតណាម នៅចំណុចលើផ្លូវលេខ ៣៦០ សង្កាត់ទួលស្វាយព្រៃ១ ខណ្ឌបឹងកេងកង រាជធានីភ្នំពេញ បណ្តាលឲ្យស្លាប់នៅនឹងកន្លែងកើតហេតុ ដែលជននេះក៏ជាមុខសញ្ញាមេជួញដូរគ្រឿងញៀនផងដែរ។
បន្ទាប់ថ្ងៃកើតហេតុ១ថ្ងៃ កម្លាំងបានធ្វើការស្រាវជ្រាវ និងចាប់បង្រ្កាបចំនួន២ទីតាំងផ្សេងៗគ្នា នៅចំណុចសណ្ឋាគារសូផៃ ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ និងមួយទីតាំងទៀតស្ថិតនៅខុនដូរហាយលេន ក្នុងសង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។
ជារួមក្នុងរង្វង់ប្រតិបត្តិការនេះ កម្លាំងសមត្ថកិច្ចជំនាញបានចាប់ខ្លួនមនុស្ស១៤នាក់ ក្នុងនោះក្រោយធ្វើការសួរនាំ រកឃើញ១០នាក់ ពាក់ព័ន្ធករណីបាញ់ប្រហារនេះ។ នៅពេលចាប់ខ្លួន សមត្ថកិច្ចដកហូតបាន រថយន្តចំនួន៣គ្រឿង, ម៉ូតូចំនួន១គ្រឿង, អាវុធខ្លីចំនួន២ដើម, បង់ចំនួន២ គ្រាប់ចំនួន៥គ្រាប់, ថ្នាំគ្រាប់ពណ៌ខៀវ និងម្សៅសមួយចំនួន ព្រមទាំងជញ្ជីងថ្លឹងថ្នាំញៀនចំនួន២។
