ភ្នំពេញ ៖ គ្រឿងញៀនជាង ១០២គីឡក្រាម ៣៥២.២៧ក្រាម និងសារធាតុគីមីផ្សំជិត១០០គីឡូក្រាមនិងជនសង្ស័យ៣នាក់ ត្រូវបានមន្ទីរប្រឆាំងគ្រឿងញៀនបង្ក្រាបនៅ ២ទីតាំងផ្សេងគ្នាក្នុងខណ្ឌសែនសុខ និងខណ្ឌចំការមន រាជធានីភ្នំពេញ។
កិច្ចប្រតិបត្ដិការនេះ អនុវត្តតាមបញ្ជានាយឧត្ដមសេនីយ៍សន្តិបណ្ឌិត អគ្គស្នងការនគរបាលជាតិ និងនាយឧត្ដមសេនិយ៍ម៉ក់ ជីតូ អគ្គស្នងការរង ទទួលផែនប្រឆាំងបទល្មើស គ្រឿងញៀន ក្រោមការបញ្ជាដឹកនាំផ្ទាល់ របស់លោកឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន។
នគរបាលមន្ទីរប្រឆាំងបទល្មើសគ្រឿងញៀនបានបញ្ជាក់ថា កាលពីថ្ងៃទី០៧ ខែសីហា ឆ្នាំ២០២៣ វេលាម៉ោង២និង១០នាទីរសៀល កម្លាំងជំនាញ នៃមន្ទីរប្រឆាំងគ្រឿងញៀន (ក៣+ក៤) ដឹកនាំបង្រ្កាបដោយលោកនាយករងមន្ទីរ ឧត្តមសេនីយ៍ទោ ប្រុញ សាន នាយករងមន្ទីរ ដោយការសហការពីកម្លាំងនគរបាលរាជធានីភ្នំពេញ ព្រមមានមានការដឹកនាំសម្របសម្រួលពីលោក ឡុង ស៊ីថា ព្រះរាជអាជ្ញារងអមសាលាដំបូងរាជធានីភ្នំពេញ បានបើកប្រតិបត្តិការបង្ក្រាបករណីជួញដូរ និងកែច្នៃដោយខុសច្បាប់នូវសារធាតុញៀន ដែលប្រព្រឹត្តនៅចំនួន ២ទីតាំង។
នគរបាលបន្តថា នៅទីតាំងទី១-ចំណុចមុខសណ្ឋគារជែឡឹកហ៊យាន ជាន់ទី០៧ បន្ទប់លេខប៊ី៧១១ ផ្លូវលេខ៣៤៥សង្កាត់ភ្នំពេញថ្មី ខណ្ឌសែនសុខ ឃាត់ខ្លួនជនសង្ស័យម្នាក់ ភេទស្រី ជនជាតិចិន ចាប់យកវត្ថុតាង សារធាតុញៀនទម្ងន់សរុប ១០២ គីឡូក្រាម ៣៥២.២៧ក្រាម និងសារធាតុគីមីផ្សំជិត១០០គីឡូក្រាម ។ចំណែកនៅទីតាំងទី២-ចំណុចតាមផ្លូវលេខ ៥៩៨ កែង៩៧ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញឃាត់ខ្លួនជនសង្ស័យចំនួន ០២នាក់ ភេទប្រុស ជនជាតិខ្មែរ។
អំឡុងពេលប្រត្តិបត្តិការក៏មានការថតវីដេអូ ពីអ្នកសារព័ត៌មាន និងសាធារណជនមួយចំនួនផងដែរ មានការបង្ហោះវីដេអូផ្សព្វផ្សាយជាសាធារណៈ ពីសកម្មភាពប្រតិបត្តិការភ្លាមៗ បានធ្វើឱ្យប៉ះពាល់ដល់ការងារបង្ក្រាប ដែលបែកការដល់មេក្លោង បានដឹងខ្លួនរត់គេចខ្លួនបាត់។
សូមបញ្ជាក់ផងដែរថា ក្នុងកិច្ចប្រត្តិបត្តិការ កម្លាំងសមត្ថកិច្ចត្រូវប្រើជំនាញ មានភាពស្វាហាប់ម៉ឺងម៉ាត់ និងបង្ក្រាបចាប់ខ្លួន មុខសញ្ញាឱ្យខាងតែបាន ដើម្បីការពារសុវត្ថិភាព ក្នុងពេលប្រតិបត្តិការ (កន្លងមកសមត្ថកិច្ចមានគ្រោះថ្នាក់ដល់អាយុជីវិត) និងបែកធ្លាយព័ត៌មានសម្ងាត់ ធ្វើឱ្យមុខសញ្ញាគេចខ្លួន។
មន្ទីរប្រឆាំងបទល្មើសគ្រឿងញៀន សូមសំណូមពរដល់សារធារណជន និងសារព័ត៌មានមួយចំនួន សុំអនុញ្ញាតពីអង្គភាពជំនាញផ្ទាល់ មុនធ្វើការចុះផ្សាយតាមបណ្តាញសង្គម និងប្រើប្រាស់ខ្លឹមសារឱ្យបានត្រឹមត្រូវតាមវិជ្ជាជីវៈសារព័ត៌មាន។
បច្ចុប្បន្នជនសង្ស័យ ព្រមទាំងវត្ថុតាង កំពុងកសាងសំណុំរឿង ដើម្បីបញ្ជូនទៅសាលាដំបូងរាជធានីភ្នំពេញ ចាត់ការបន្តតាមនីតិវិធី ៕(ដោយ សំណាង៩៦)
