កណ្តាល ៖ កម្លាំងជំនាញនៃស្នងការដ្ឋាននគរបាលខេត្តកណ្ដាលបានស្រាវជ្រាវរកឃើញមុខសញ្ញាជាម្ចាស់ម៉ូតូកង់បីឥណ្ឌា( Pass App )រួមទាំងម៉ូតូកង់បីឥណ្ឌា នាយប់ថ្ងៃទៅ១៥សីហាឆ្នាំ២០២៣ ដែលបំពានច្បាប់ចរាចរណ៍ ហើយបានគំរាមកំហែងប្រុងប្រើហិង្សា ទៅលើអ្នកដំណើរដែលគោរពច្បាប់ ។
សមត្ថកិច្ចនិយាយថា អ្នកបើកបរឈ្មោះ កែ ឃឹម អាយុ៤៧ ឆ្នាំ មានទីលំនៅស្រុកខ្សាច់កណ្តាល ខេត្តកណ្តាល។ ម៉ូតូកង់បីឥណ្ឌា ដែលបើកបញ្ច្រាសទិសពណ៌ស ពាក់ស្លាកលេខ កណ្តាល 1AB-5481 ។
សមត្ថកិច្ចបន្តថា ដំបូងម្ចាស់ម៉ូតូកង់បី បានបើកបរតាមមហាវិថីព្រះនរោត្តមពីជើងទៅត្បូងបញ្ច្រាសទិស, លុះដល់មុខស្ថានទូតថៃ សង្កាត់ទន្លេបាសាក់ ខណ្ឌចំការមន ក៏មានរថយន្តមួយគ្រឿងដែលបើកស្របទិសដៅ ស្រាប់តែម្ចាស់ម៉ូតូកង់បីចេញមករករឿងឈ្លោះ ហើយស្ទុះយកដែកជ្រុងប្រុងវាយទៅលើម្ចាស់រថយន្តថែមទៀង ។ បន្ទាប់មកបុរសនោះក៏បើកម៉ូតូកង់បីគេចបាត់។ រហូតដល់ពេលយប់ទើបសមត្ថកិច្ចចាប់ខ្លួនបាន ។
លោកឧត្ដមសេនីយ៍ទោ ឈឿន សុចិត្រ ស្នងការនគរបាលខេត្តកណ្ដាល បានឱ្យដឹងថា «ជើងខ្លាំងបើក Pass App បញ្ច្រាស់ទិសដៅចរាចរណ៍ហើយគំរាមកំហែងប្រជាពលរដ្ឋនោះពេលនេះ សមត្ថកិច្ចនគរបាលខេត្តកណ្ដាល ឃាត់ខ្លួនបានហើយនៅស្រុកខ្សាច់កណ្ដាល» ។
ពេលនេះសមត្ថកិច្ចនគរបាលខេត្តកណ្ដាលកំពុងរៀបចំបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីចាត់ការបន្ត ដោយហេតុការណ៍នេះកើតឡើងនៅរាជធានីភ្នំពេញ ៕(ដោយ ៖ ប៉ូច គឹមសុខ)
