បរទេស ៖ លោក វ៉ូឡូឌីមៀ ហ្សេលេនស្គី ប្រធានាធិបតីអ៊ុយក្រែនបានប្តេជ្ញាសងសឹកចំពោះរុស្ស៊ី បន្ទាប់ពីពួកគេបានបាញ់មីស៊ីលទៅលើទីក្រុងមួយ បណ្តាលឱ្យមនុស្ស ៧នាក់បាត់បង់ជីវិត និង របួសជាង១០០នាក់ កាលពីថ្ងៃសៅរ៍កន្លងទៅ ។
លោកហ្សេលេនស្គី បានសន្យានៅក្នុងសុន្ទរកថាតាមវីដេអូកាលពីព្រឹកថ្ងៃអាទិត្យទី២០សីហាថា «ទាហានអ៊ុយក្រែននឹង ឆ្លើយតបជាក់ស្តែង ចំពោះការវាយប្រហារទៅលើរោងមហោស្រពនិងទីលានសាធារណៈក្នុងទីក្រុងឆឺនីហ៊ីវ(Chernihiv) ភាគខាងជើង កាលពីថ្ងៃសៅរ៍»។
លោកបានបន្ថែមថា «ចូរយើងប្រឹងប្រែងបន្ថែមទៀតដើម្បីបង្រួបបង្រួមពិភពលោកប្រឆាំងនឹងភេរវកម្មរបស់រុស្ស៊ី។សូមជួយផ្តល់ឱ្យរដ្ឋយើងកាន់តែច្រើន ដើម្បីការពារអាយុជីវិតប្រជាជន ។ រុស្ស៊ីត្រូវតែចាញ់សង្គ្រាមនេះដើម្បីឱ្យអាយុជីវិតជាអ្នកឈ្នះ»។
លោកប្រធានាធិបតីអាយុ ៤៥ ឆ្នាំរូបនេះបានថ្លែងនៅចុងបញ្ចប់នៃដំណើរទស្សនកិច្ចទៅកាន់ប្រទេសស៊ុយអែត ថា«មានកុមារ ១៥ នាក់បានស្ថិតក្នុងចំណោមអ្នករងរបួសហើយក៏បានបញ្ចេញឈ្មោះក្មេងស្រីសូហ្វីយ៉ា (Sofia) អាយុ៦ឆ្នាំថាជាមនុស្សម្នាក់ក្នុងចំណោមអ្នកបាត់បង់ជីវិតក្នុងសោកនាដកម្មនេះផងដែរ»។
មានជនស៊ីវិលជាច្រើននាក់ ដែលកំពុងប្រារព្ធពិធីបុណ្យសាសនាគ្រិស្តអូស្សូដក់ (Orthodox) នៅព្រះវិហារក្បែរនោះ ដែលរងការខូចខាតរួមជាមួយនឹងអគារសាកលវិទ្យាល័យមួយនៅជិតគ្នា។
លោក វីយ៉ាឆេស្លាវ ឆូស (Vyacheslav Chaus) អភិបាលនៃតំបន់ទីក្រុងឆឺនីហ៊ីវ បានបង្ហាញថា មានមនុស្សសរុប១៤៨ នាក់បានរងរបួសនៅក្នុងការវាយប្រហារ ដែលត្រូវបានថ្កោលទោសដោយអង្គការសហប្រជាជាតិថាសាហាវឃោរឃៅ។
លោក ដេនីស ប្រោន (Denise Brown) អ្នកសម្របសម្រួលផ្នែកមនុស្សធម៌របស់អ.ស.បសម្រាប់អ៊ុយក្រែន បាននិយាយថា «វាសាហាវណាស់ក្នុងការវាយលុកទីលានសំខាន់ៗនៃទីក្រុងធំមួយទាំងព្រឹក ខណៈដែលមនុស្សកំពុងដើរនិងអ្នកខ្លះកំពុងទៅព្រះវិហារដើម្បីប្រារព្ធពិធីបុណ្យសាសនាសម្រាប់ប្រជាជនអ៊ុយក្រែនភាគច្រើន»។
ចំណែកអាជ្ញាធរអ៊ុយក្រែននិយាយថា រុស្ស៊ីបានកំណត់គោលដៅដោយចេតនាលើរោងមហោស្រពនេះ ព្រោះទីកន្លែងនេះកំពុងរៀបចំការប្រមូលផ្តុំនៃក្រុមហ៊ុនផលិតដ្រូន។
លោក អូឡេកសាន់ឌឺ ឡូម៉ាកូ (Oleksandr Lomako) អភិបាលក្រុងឆឺនីហ៊ីវ បានប្រាប់ BBC ថា «ខ្ញុំយល់ថាគោលបំណងរបស់ពួកគេគឺព្រឹត្តិការណ៍យោធា ដែលកើតឡើងនៅក្នុងអគារល្ខោន ហើយវាជាគោលដៅរបស់ពួកគេ។ រុស្ស៊ីដឹងយ៉ាងច្បាស់ថា ការវាយប្រហារនេះនឹងបណ្តាលឱ្យជនស៊ីវិលស្លាប់»។
លោកបន្តថា «វាច្បាស់ណាស់ថា រុស្ស៊ី ដែលបាញ់មីស៊ីលទាំងនោះនិង អ្នកដែលបញ្ជាឱ្យបាញ់ទាំងកណ្តាលថ្ងៃត្រង់ទៅកាន់ទីក្រុងស៊ីវិល បានដឹងថា ជនរងគ្រោះភាគច្រើននឹងជាជនស៊ីវិល។ គ្មានវិធីណាផ្សេងក្នុងការបកស្រាយវាក្រៅតែពីឧក្រិដ្ឋកម្មសង្គ្រាមប្រឆាំងនឹងជនស៊ីវិលនោះឡើយ ដែលនេះជាឧក្រិដ្ឋកម្មសង្គ្រាមមួយទៀតរបស់រុស្ស៊ី»៕(ប្រែសម្រួលដោយ លោកសំណាង)