ភ្នំពេញ ៖ ថ្មីៗនេះ កម្លាំងនគរបាលនាយកដ្ឋាននគរបាលព្រហ្មទណ្ឌបានបង្ក្រាបក្រុមចោរជំនាញកញ្ចក់រថយន្ត និង លួចម៉ូតូ៣នាក់ជាបន្តបន្ទាប់ ហើយបានបង្ហាញមុខមុនពេលបញ្ជូនឡើងតុលាការ នៅថ្ងៃទី២៧ខែសីហា ឆ្នាំ២០២៣ ។
សមត្ថកិច្ចនិយាយថា ដំបូងលោកឧត្តមសេនីយ៍ត្រី ប៊ុត វណ្ណារដ្ឋ អនុប្រធាននាយកដ្ឋានទទួលផែន បានដឹកនាំកម្លាំងជំនាញការិយាល័យព្រហ្មទណ្ឌកម្រិតធ្ងន់ ដែលមានលោកវរសេនីយ៍ឯក ញ៉ែម វ៉ន ជានាយការិយាល័យ ដោយមានការចូលរួមសហការពីលោក វរសេនីយ៍ទោ ប៊ុត សុីម៉េង បានចុះល្បាតតាមផ្លូវលេខ៦៣កែងផ្លូវលេខ២១៤ ក្នុងសង្កាត់បឹងរាំង ខណ្ឌដូនពេញ នៅថ្ងៃទី២៥ ខែសីហា ឆ្នាំ២០២៣ វេលាម៉ោង១០និង៥០នាទីយប់ ក៏ប្រទះឃេីញជនសង្ស័យ ជិះម៉ូតូចំនួន០២គ្រឿង មានគ្នា៣នាក់បានធ្វេីសកម្មភាពគាស់យកកញ្ចក់រថយន្តដែលចតទុកចោលបានសម្រេច។
សមត្ថកិច្ចបន្តថឋ ភ្លាមនោះកម្លាំងនគរបាលជំនាញការិយាល័យ ឃាត់ខ្លួនជនសង្ស័យបានទាំង០២នាក់ នៅចំណុចកេីតហេតុភ្លាមៗ ហើយបន្តប្រដេញឃាត់បានជនសង្ស័យម្នាក់ទៀត បាននៅចំណុចផ្លូវលេខ១៩កែងផ្លូវលេខ១៤៨ សង្កាត់ផ្សារកណ្តាលទី១ ខណ្ឌដូនពេញ ។
សមត្ថកិច្ចបម្តថា ជនសង្ស័យ៣នាក់រួមមាន ១-ឈ្មោះ សេត វណ្ណឌី ភេទប្រុស អាយុ៣១ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះមិនចាំលេខ ផ្លូវលំ ក្នុងសង្កាត់ទួលសង្កែទី១ ខណ្ឌឫស្សីកែវ ,២-ឈ្មោះ ថោង សុវណ្ណឌីភេទប្រុស អាយុ៣២ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះមិនចាំ ផ្លូវលំ ភូមិ២១ សង្កាត់ស្រះចក ខណ្ឌដូនពេញ និង៣-ឈ្មោះ ណាត កក្កដា ភេទប្រុស អាយុ៣៣ឆ្នាំ ជនជាតិខ្មែរ មុខរបររត់កង់បី ស្នាក់នៅផ្ទះជួល ផ្លូវលំ ភូមិ៦ សង្កាត់ស្រះចក ខណ្ឌដូនពេញ ។
បន្ទាប់មកកម្លាំងនគរបាលជំនាញ មានការសង្ស័យថា ជនសង្ស័យឈ្មោះខាងលេីមានការពាក់ព័ន្ធករណី«លួចម៉ូតូ»ដែលប្រព្រឹត្តនៅចំណុចមុខផ្ទះលេខ៨៩Eo ផ្លូវលេខ២១៤ ក្នុងសង្កាត់បឹងព្រលឹត ខណ្ឌ៧មករា ទើបកម្លាំងនគរបាលជំនាញបានបង្ហាញវីឌីអូកាមេរ៉ាសុវត្ថិភាព ឱ្យទៅជនសង្ស័យទាំង០៣នាក់មេីល។
ពេលនោះជនសង្ស័យឈ្មោះ សេត វណ្ណឌី ចង្អុលថា «ម៉ូតូម៉ាកនិច ពណ៌ស ដែលមានស្លាកលេខ ភ្នំពេញ 1JC-6384ពិតជារបស់ខ្លួនឌុបបក្សពួកដែលមានឈ្មោះ ញីវ មកធ្វេីសកម្មភាពលួចម៉ូតូម៉ាកស៊ុយស៊ូគី និច ពណ៌ទឹកប្រាក់ ពាក់ស្លាកលេខ ភ្នំពេញ 1HG-5904នៅចំណុចខាងលេីពិតប្រាកដមែន។ ជនសង្ស័យឈ្មោះ ញីវ បានយកម៉ូតូដែលលួចជិះគេចខ្លួនបាត់»។
វត្ថុតាងដកហូតរួមមាន ១-ម៉ូតូស៊ុយស៊ូគី និច ពណ៌ស ពាក់ស្លាកលេខ ភ្នំពេញ 1JC-6384 ជារបស់ជនសង្ស័យ, ២-ម៉ូតូហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ 1AR-7989 ជារបស់ជនសង្ស័យ និង កញ្ចក់រថយន្ត១ចំហៀង (របស់ជនរងគ្រោះ)
បច្ចុប្បន្ន កម្លាំងនគរបាលជំនាញបាននាំជនសង្ស័យខាងលេីមកនាយកដ្ឋាននគរបាលព្រហ្មទណ្ឌ ដេីម្បីសាកសួរ និងកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញចាត់ការតាមនីតិវិធី នាថ្ងៃទី២៧សីហាឆ្នាំ២០២៣៕(ដោយ សំណាង៩៦)