ព្រះសីហនុ ៖ មានករណីគ្រោះអគ្គិភ័យឆេះផ្ទះពលរដ្ឋចំនួន០២ខ្នង កើតឡើងនាថ្ងៃចន្ទ ទី២៨ ខែសីហា ឆ្នាំ២០២៣ វេលាម៉ោង ០៧និង១០ នាទីព្រឹក នៅចំណុចភូមិ១ សង្កាត់លេខ៤ ក្រុង-ខេត្តព្រះសីហនុ រងរបួសស្រាលម្នាក់កំពុងសម្រាកព្យាបាលនៅមន្ទីពេទ្យ ។
សមត្ថកិច្ចនិយាយថា ម្ចាស់ផ្ទះទី១-ឈ្មោះ អ៊ួក សុិន ភេទស្រី អាយុ៧០ឆ្នាំ មុខរបរ មេផ្ទះ ប្រភេទសំណង់ដែលឆេះសង់ពីថ្មក្រោមឈើលើ មានទំហំ ៨ម៉ែត្រគុណនឹង១០ម៉ែត្រ រងការខូចខាតឆេះទាំងស្រុងនិងម្ចាស់ផ្ទះទី២-ឈ្មោះ ជា បុត្រថា ភេទស្រី អាយុ ៥៣ ឆ្នាំ មុខរបរលក់ដូរ ប្រភេទសំណង់ដែលឆេះសង់ពីថ្មក្រោមឈើលើ មានទំហំផ្ទះ ៧ម៉ែត្រគុណនឹង៩ម៉ែត្រ ការខូចខាតឆេះទាំងស្រុង ។ មូលហេតុឆេះកំពុងបន្តការស្រាវជ្រាវ ។
ករណីខាងលេីនេះ ត្រូវបានកងកម្លាំងបង្ការពន្លត់អគ្គិភ័យបានចេញអន្តរាគមន៍រថយន្តពន្លត់អគ្គិភ័យរបស់ស្នងការដ្ឋាននគរបាលខេត្តព្រះសីហនុចំនួន ០៣ គ្រឿង បានប្រើប្រាស់ទឹកអស់ចំនួន០៣រថយន្ត ហើយរលត់ទាំងស្រុងនៅវេលាម៉ោង ០៨និង៣០ នាទីព្រឹក ថ្ងៃខែឆ្នាំដដែល ៕(ដោយ ប៉ូច គឹមសុខ)
