ភ្នំពេញ ៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានជម្រាបជូនឯកអគ្គរាជទូតជប៉ុន ប្រចាំនៅកម្ពុជា នូវកិច្ចការសំខាន់ៗ ៦ចំណុច ក្រោមសមត្ថកិច្ចរបស់ក្រសួងមហាផ្ទៃ ក្នុងឱកាសដែលឯកឧត្តមអភិសន្តិបណ្ឌិត អនុញ្ញាតអោយឯកឧត្តម UENO Atsushi ឯកអគ្គរាជទូតជប៉ុន ប្រចាំនៅកម្ពុជា ចូលជួបសម្ដែងការគួរសម កាលពីរសៀលថ្ងៃទី០៤ ខែកញ្ញាឆ្នាំ២០២៣ នៅទីស្ដីការក្រសួងមហាផ្ទៃ។
ជាកិច្ចចាប់ផ្ដើម ឯកឧត្តមអភិសន្តិបណ្ឌិត ស សុខា បាននាំយកការផ្ដាំផ្ញើសាកសួរសុខទុក្ខពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា សម្ដេចក្រឡាហោម ស ខេង អតីតឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃជូនចំពោះឯកឧត្តម ឯកអគ្គរាជទូតជប៉ុន។
ឯកឧត្តម ឯកអគ្គរាជទូតជប៉ុន បានយកឱកាសនេះ ជម្រាបជូនឯកឧត្តមអភិសន្តិបណ្ឌិត ថា កន្លងមក សម្ដេចក្រឡាហោម ស ខេងអតីតឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានផ្ដល់ការគាំទ្រជាច្រើន ជាពិសេសនៅក្នុងការលើកកម្ពស់ទំនាក់ទំនង និងកិច្ចសហប្រតិបត្តិការរវាងជប៉ុន-កម្ពុជា។ ឯកឧត្តមសង្ឃឹមថា ការលើកកម្ពស់ទំនាក់ទំនងជិតស្និត នឹងនៅតែបន្តជាមួយឯកឧត្តមអភិសន្តិបណ្ឌិត ក្នុងអាណត្តិបន្ដនេះផងដែរ។
បន្ថែមពីនេះឯកឧត្តមអភិសន្តិបណ្ឌិត ស សុខា ក៏បានជម្រាបជូនឯកឧត្តម ឯកអគ្គរាជទូតជប៉ុន ថា ទំនាក់ទំនងរវាងកម្ពុជា-ជប៉ុន បានបន្ដវិវត្តន៍យ៉ាងល្អប្រសើរឥតឈប់ឈរ ជាពិសេសក្នុងរយៈពេល ១០ឆ្នាំចុងក្រោយនេះ ហើយពិសេសទៀតនោះ គឺនៅក្នុងឆ្នាំនេះគឺជាខួបទី ៧០ឆ្នាំ នៃទំនាក់ទំនងការទូតរវាងប្រទេសទាំងពីរ ហើយក៏ជាពេលវេលាប្រទេសទាំងពីរ បន្តពង្រឹងកិច្ចសហប្រតិបត្តិការដែលជាកិច្ចសហប្រតិបត្តិការគ្រប់ជ្រុងជ្រោយ។
ឯកឧត្តមអភិសន្ដិបណ្ឌិត ស សុខា ក៏បានថ្លែងអំណរគុណចំពោះរដ្ឋាភិបាល និងប្រជាជនជប៉ុន ដែលបានចូលរួមគាំទ្រដល់កិច្ចការផ្សេងៗទៀត តួយ៉ាង ការងាររៀបចំការបោះឆ្នោត ការងារកំណែទម្រង់វិមជ្ឈការ និងវិសហមជ្ឈការ ព្រមទាំងការអភិវឌ្ឍធនធានមនុស្ស នៅព្រះរាជាណាចក្រកម្ពុជា។
ជាមួយគ្នានេះផងដែរ ឯកឧត្តមអភិសន្ដិបណ្ឌិត ក៏បានជម្រាបជូន ឯកឧត្តមឯកអគ្គរាជទូតជប៉ុន នូវការដាក់ចេញនូវយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ជាពិសេសកិច្ចការសំខាន់ៗ ដែលស្ថិតក្រោមសមត្ថកិច្ចក្រសួងមហាផ្ទៃចំនួន ៦ រួមមាន ៖ ទី១. ការងារប្រយុទ្ធប្រឆាំងគ្រឿងញៀន ទី២. ការពង្រឹងនូវសមត្ថភាពចរាចរណ៍ ទី៣. ការទប់ស្កាត់នូវអំពើចោរកម្ម និងអំពើល្មើសផ្សេងៗ ទី៤. ការប្រយុទ្ធប្រឆាំងការជួញដូរមនុស្ស ទី៥. ការកេងប្រវ័ញ្ចផ្លូវភេទ និងទី៦. ការពង្រឹងការគ្រប់គ្រងសុវត្ថិភាព និងការពារតាមព្រំដែន។
សូមជម្រាបជូនដែរថា នៅក្នុងជំនួបនេះដែរ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងឯកឧត្តម UENO Atsushi ឯកអគ្គរាជទូតជប៉ុន ប្រចាំនៅកម្ពុជា ក៏បានពិភាក្សា ព្រមទាំងផ្លាស់ប្តូរយោបល់លើកិច្ចការងារមួយចំនួនទៀត ដូចជា ៖ ការបណ្តុះបណ្តាលធនធានមនុស្ស នៃព្រះរាជាណាចក្រកម្ពុជា ការលើកម្ពស់ការផ្តល់សេវាក្នុងពន្ធនាគារ និងការជំរុញ និងការអភិវឌ្ឍទីក្រុងឆ្លាតវៃ ស្របតាមបរិបទ នៃការរីកចម្រើន នៃបច្ចេកវិទ្យាឌីជីថល៕ ដោយ ៖ ហួត សម្បត្តិ
