កណ្តាល ៖ ជនសង្ស័យ៤នាក់ចំណោមច្រើននាក់ ត្រូវបានសមត្ថកិច្ចឃាត់ខ្លួន កាលពីថ្ងៃអាទិត្យ ទី០១ ខែតុលា ឆ្នាំ២០២៣ វេលាម៉ោង១និង៤០ នាទីរសៀលពាក់ព័ន្ធលេងល្បែងស៊ីសងខុសច្បាប់ប្រភេទបាញ់អាប៉ោង នៅចំណុចភូមិព្រែកតាកែវ២ ឃុំសំរោងធំ ស្រុកកៀនស្វាយ ខេត្តកណ្ដាល ។
សមត្ថកិច្ចនិយាយថា ជនសង្ស័យ៤នាក់រួមមាន ១-ឈ្មោះកុច ម៉ាច ភេទ ប្រុស អាយុ៦៤ឆ្នាំ ជនជាតិខ្មែរ មុខរបរកសិករមានទីលំនៅភូមិជ្រោយដង ឃុំសំរោងធំ, ២-ឈ្មោះភុម កុយ ភេទប្រុស អាយុ៥៥ឆ្នាំ ជនជាតិខ្មែរ មុខរបរកសិករ មានទីលំនៅបចុ្ចប្បន្នខេត្តកំពង់ចាម ស្នាក់នៅបណ្តោះភូមិព្រែកតាកែវ២ ឃុំសំរោងធំ ,៣-ឈ្មោះដួង សុខុម ភេទប្រុសអាយុ៦៣ឆ្នាំ ជនជាតិខ្មែរ មុខរបរនិវត្តជន មានទីលំនៅភូមិព្រែកតាកែវ ឃុំសំរោងធំ និង៤-ឈ្មោះផល សំណាង ភេទ ប្រុស អាយុ១៩ឆ្នាំ ជនជាតិខ្មែរ មុខរបរកសិករ មានទីលំនៅភូមិ ព្រែកតាកែវ២ ឃុំសំរោងធំ ស្រុកកៀនស្វាយ និងដកហូតវត្ថុតាងមួយចំនួនធំ ។
សមត្ថកិច្ចបន្តថា ខណៈកម្លាំងព្រហ្មទណ្ឌស្រុកកៀនស្វាយ បានចេញល្បាតក្នុងភូមិសាស្រ្តឃុំសំរោងធំ ក៏ប្រទះឃើញមុខសញ្ញាមួយក្រុម កំពុងលេងល្បែងស៊ីសងប្រភេួអាប៉ោង ភ្លាមនោះកម្លាំងព្រហ្មទណ្ឌស្រុក ក៏ចុះចុះបង្រ្កាបឃាត់មុខសញ្ញា៤នាក់ និងមួយចំនួនទៀតរត់គេចខ្លួន ។
បន្ទាប់ពីសាកសួររួច នគរបាលជំនាញសុំគោលការណ៍ឃាត់ខ្លួនបណ្តោះអាសន្ន និងកសាងសំណុំរឿង នៅអធិការដ្ឋាននគរបាលស្រុកកៀនស្វាយ ដើម្បីបន្តតាមនីតិវិធីច្បាប់៕(ដោយ ប៉ូច គឹមសុខ)
