បរទេស ៖ លោក ចូ បៃដិន (Joe Biden) ប្រធានាធិបតីអាមេរិកបាននិយាយកាលពីថ្ងៃអាទិត្យថា «លោកជឿថាក្រុមសកម្មប្រយុទ្ធហាម៉ាសត្រូវតែលុបបំបាត់ចោលឱ្យអស់ ប៉ុន្តែគួរតែមានផ្លូវបង្កើតរដ្ឋប៉ាឡេស្ទីនមួយ បន្ទាប់ពីមន្ត្រីកំពូលរបស់សហរដ្ឋអាម៉េរិកបានព្រមានថា សង្រ្គាមរវាងអ៊ីស្រាអែលនិងក្រុមហាម៉ាសអាចនឹងរីកធំឡើង»។
លោកបៃដិនមិនបានគិតថា កងទ័ពអាមេរិកនឹងចាំបាច់ជួយវាយលុកតាមជើងគោកទេ ដោយសារអ៊ីស្រាអែលមានកងកម្លាំងប្រយុទ្ធដ៏ល្អបំផុត ត្បិតនាវាចម្បាំងអាមេរិកបានធ្វើដំណើរទៅកាន់តំបន់នោះ ចំពេលមានការប៉ះទង្គិចខ្លាំងឡើងៗនៅព្រំដែនភាគខាងជើងរបស់អ៊ីស្រាអែល ជាមួយលីបង់ ក៏ដោយ។
ចំណែកអ៊ីស្រាអែល បានបើកយុទ្ធនាការទម្លាក់គ្រាប់បែកយ៉ាងច្រើននៅជុំវិញតំបន់ហ្គាហ្សាដើម្បីសងសឹកចំពោះការវាយប្រហារមិនធ្លាប់មានពីសំណាក់ក្រុមហាម៉ាសកាលពី ៨ ថ្ងៃមុន ដែលបានសម្លាប់ជនជាតិអ៊ីស្រាអែលប្រហែល១.៣០០ នាក់ ដែលភាគច្រើនជាជនស៊ីវិល។
ខណៈពេលត្រូវបានសួរថា តើគាត់ជឿថាក្រុមហាម៉ាសត្រូវតែលុបបំបាត់ទាំងស្រុងឬយ៉ាងណានោះ? លោកបៃដិនបានប្រាប់កម្មវិធី 60 Minutes របស់ទូរទស្សន៍ CBS កាលពីថ្ងៃអាទិត្យថា «ពិតណាស់ ខ្ញុំជឿដូច្នេះ។ ប៉ុន្តែត្រូវតែមានអាជ្ញាធរប៉ាឡេស្ទីនមួយ។ ត្រូវតែមានផ្លូវទៅរកការបង្កើតរដ្ឋប៉ាឡេស្ទីន»។
លោកប្រធានាធិបតីអាមេរិកបានព្រមានថា វាអាចជាកំហុសមួយសម្រាប់អ៊ីស្រាអែលក្នុងការកាន់កាប់តំបន់ហ្គាហ្សាប៉ុន្តែការដកក្រុមហេសបូឡានិងក្រុមហាម៉ាសចេញគឺជាតម្រូវការចាំបាច់។ លោកបាននិយាយថា «វានឹងជាកំហុស… សម្រាប់អ៊ីស្រាអែលដែលកាន់កាប់…តំបន់ហ្គាហ្សាម្តងទៀត»។
សូមបញ្ជាក់ថា អ៊ីស្រាអែលបានដណ្តើមយកនិងកាន់កាប់តំបន់វេសប៊ែង ហ្គាហ្សា និង ហ្ស៊េរុយសាឡិមខាងកើត ក្នុងសង្រ្គាមមជ្ឈិមបូព៌ាឆ្នាំ ១៩៦៧។ អ៊ីស្រាអែលបានដកអ្នកតាំងលំនៅ និងកងទ័ពរបស់ខ្លួនចេញពីតំបន់ហ្គាហ្សាក្នុងឆ្នាំ២០០៥ មុនពេលដែលក្រុមហាម៉ាសចូលកាន់កាប់ហ្គាហ្សាស្ទ្រីបក្នុងឆ្នាំ ២០០៧ ហើយជម្លោះបានធ្វើឱ្យភាពតានតឹងកើនឡើងជាលំដាប់។
ចំណែកទីប្រឹក្សាសន្តិសុខជាតិរបស់សេតវិមាន លោក ជែក ស៊ូលីវ៉ាន់ (Jake Sullivan) បានប្រាប់ CBS នៅព្រឹកថ្ងៃអាទិត្យថា «មានហានិភ័យនៃការកើនឡើងជម្លោះ ការបើកសមរភូមិទីពីរនៅភាគខាងជើង និង ពិតណាស់ គឺការចូលរួមរបស់អ៊ីរ៉ង់»។
ឯអាជ្ញាធរហ្គាហ្សាបាននិយាយថា មានមនុស្សជាង ២.៦៧០ នាក់ត្រូវបានសម្លាប់នៅទីនោះ ដោយមួយភាគបួននៃពួកគេជាកុមារ។ ចំនួនអ្នកស្លាប់ និងរបួសត្រូវគេរំពឹងថានឹងកើនឡើង នៅពេលដែលអ៊ីស្រាអែលត្រៀមសម្រាប់ការវាយលុកតាមជើងគោកលើតំបន់តូចមួយនេះ ដែលមានប្រជាជនរស់នៅយ៉ាងច្រើនក្រាស់ក្រែល ដែលអាចចាប់ផ្តើមក្នុងរយៈពេលប៉ុន្មានថ្ងៃទៀត។
លោក ឡយ អូស្ទីន រដ្ឋមន្ត្រីក្រសួងការពារជាតិអាមេរិក បានប្រកាសដាក់ពង្រាយក្រុមនាវាផ្ទុកយន្តហោះទីពីរកាលពីល្ងាចថ្ងៃសៅរ៍ ដោយហៅវាថាជាសញ្ញានៃ ការតាំងចិត្តរបស់យើងក្នុងការរារាំងរដ្ឋឬតួអង្គមិនមែនរដ្ឋណាមួយដែលព្យាយាមបង្កើនសង្រ្គាមនេះ»។ នាវាផ្ទុកយន្តហោះ Dwight Eisenhower នឹងចូលរួមជាមួយកងនាវាតូចមួយរួមទាំងនាវាផ្ទុកយន្តហោះដ៏ធំ Gerald R. Ford នៅសមុទ្រមេឌីទែរ៉ាណេខាងកើត៕(ប្រែសម្រួលដោយ លោកសំណាង)