ភ្នំពេញ៖ សពកុមារាអាយុ០២ឆ្នាំម្នាក់ បានបាត់ខ្លួនចំនួនពីរយប់បីថ្ងៃ ត្រូវបានសាច់ញាតិប្រទះឃើញស្លាប់នៅលើដំបូលធ្នើរបន្ទប់ទឹក នៅក្នុងបន្ទប់ស្នាក់នៅដោយសារឱពុកបង្កេីតញៀនថ្នាំលើសកម្រិត ជាអ្នកចាប់ជើងបោកនឹងជញ្ជាំងបណ្តាលឱ្យស្លាប់។
ហេតុការណ៍នេះបង្កការភ្ញាក់ផ្អើលកាលពីវេលាម៉ោង៣និង៣០នាទីរសៀល ថ្ងៃចន្ទ ទី២៣ ខែតុលា ឆ្នាំ២០២៣ នៅចំណុចបន្ទប់ជួលជាន់ផ្ទាល់ដី ផ្ទះគ្មានលេខ ផ្លូវលេខ៣១០ ភូមិ១ សង្កាត់ទួលស្វាយព្រៃ១ ខណ្ឌបឹងកេងកង រាជធានីភ្នំពេញ ។
ប្រភពពីសមត្ថកិច្ចបានឱ្យដឹងថា ជនសង្ស័យឈ្មោះភួង ភី អាយុ៣៦ឆ្នាំ មុខរបររើសអេតចាយ ស្នាក់នៅផ្ទះជួលម្តុំផ្សាររន្ទះបាញ់ ផ្លូវច្រកតូច សង្កាត់ទន្លេសាក់ ខណ្ឌចំការមន វិជ្ជមាន(+)ថ្នាំញៀនក្នុងខ្លួន។ ចំណែកប្រពន្ធឈ្មោះ រំដួល អាយុ៣៤ឆ្នាំ ស្នាក់នៅបន្ទប់ជួលកើតហេតុ មុខរបររើសអេតចាយ, ចំណែកកុមារារងគ្រោះឈ្មោះ ស៊ុម សុខយុទ្ធអាយុ២ឆ្នាំ ។
ប្រភពពីស្ត្រីឈ្មោះបុប្ជា អាយុ៣៥ឆ្នាំ ត្រូវជាប្អូនបង្កើតរបស់ស្ត្រីឈ្មោះ រំដួល ម្តាយកុមារារងគ្រោះ បានប្រាប់ឱ្យដឹងថា «ក្មេងរងគ្រោះ នោះជាកូនរបស់ជនសង្ស័យឈ្មោះភួង ភី ហើយយកូននោះកេីតនៅអាយុ០៧ខែ ឪពុកម្ដាយគ្មានលទ្ធភាពចិញ្ចឹម រូបគាត់និងជីដូន ក៏សម្រេចយកមកចិញ្ចឹម ហើយស្នាក់នៅបន្ទប់ជាប់គ្នារហូតដល់ធំបានអាយុ០២ឆ្នាំ ។
ប្រភពដដែលបន្តថា ជនសង្ស័យឈ្មោះ ភី មានកូនចំនួន០៣នាក់ ហើយរូបគេជាមនុស្សញៀនថ្នាំ ។ ចរិករបស់ជនសង្ស័យគឺស្អប់កូនប្រុសណាស់ សូម្បីតែកូនទី០១ ក៏រូបគេមិនចូលចិត្តឡេីយ ដោយរូបគេស្រឡាញ់តែកូនស្រីប៉ុណ្ណោះ ។
ប្រភពដដែលបន្តថា កុមារារងគ្រោះបានបាត់ខ្លួនកាលពីរសៀលថ្ងៃទី២១ ខែតុលា ហើយសាច់ញាតិព្យាយាមរកយ៉ាងណាក៏មិនឃើញ ក៏ប្តឹងសមត្ថកិច្ចឱ្យជួយរក ហើយសាច់ញាតិមានការសង្ស័យទៅលើឪពុកបង្កើត ដោយសារតែរូបគេ និង ប្រពន្ធ មិនហ៊ានគេងនៅក្នុងបន្ទប់ខ្លួនឯងឡើយ។
ប្រភពពីជីដូនបន្តថា គាត់តែងតែឮសម្លេងក្មេងយំ នៅក្នុងបន្ទប់កើតហេតុ ក៏សម្រេចឱ្យកូនក្មួយ ចូលទៅរកមើលជាច្រើនដង ទើបប្រទះឃើញសពកុមារារងគ្រោះ នៅលើធ្នើរបន្ទប់ទឹក ដោយសពត្រូវបានជនសង្ស័យសម្លាប់យកទៅលាក់ ហើយយកខោអាវ តុក្កតាកប់ពីលើ ។
ភ្លាមៗបន្ទាប់ពីទទួលបានដំណឹងថាមានករណីប្រទះឃើញក្មេងស្លាប់នោះ សមត្ថកិច្ចក៏ស្រាវជ្រាវឃាត់ខ្លួនបានជនសង្ស័យជាឪពុកបង្កើត នៅចំណុចភូមិ១៦ សង្កាត់ទន្លេបាសាក់ ខណ្ឌចំការមន ខណៈធ្វើជាមកដាក់ពាក្យបណ្តឹង ។ជនសង្ស័យសារភាពថា«ខ្លួនបានចាប់ជើងកូនប្រុសអាយុ២ឆ្នាំបោកទៅនឹងជញ្ជាំងផ្ទះបណ្តាលឱ្យបែកក្បាលស្លាប់»។
បច្ចុប្បន្នសមត្ថកិច្ចបានឃាត់ខ្លួនជនសង្ស័យជាឪពុកនាំទៅកាន់អធិការដ្ឋានខណ្ឌបឹងកេងកងសាកសួរនាំ តាមនីតិវិធី។ ចំណែកសពសមត្ថកិច្ចជំនាញបច្ចេកទេសវិទ្យាសាស្ត្រ និង សមត្ថកិច្ច CPU សហការធ្វើកោសល្យវិច័យ នៅកន្លែងកើតហេតុ បញ្ជាក់ថា«ពិតជាករណីឃាតកម្មគិតទុកជាមុន បង្កឡើងដោយឪពុកញៀនថ្នាំលើសកម្រិត» ហើយសពប្រគល់ឱ្យម្តាយយកទៅធ្វើបុណ្យតាមប្រពៃណី នៅស្រុកកំណើត ៕ (ដោយ សំណាង៩៦)
