បរទេស ៖ អ៊ីស្រាអែល បានប្តេជ្ញាម្តងទៀតថា នឹងបំផ្លាញក្រុមហាម៉ាស ដោយបដិសេធការអំពាវនាវរបស់ប្រមុខអង្គការសហប្រជាជាតិ(អ.ស.ប.) ប៉ាឡេស្ទីន និងប្រទេសជាច្រើននៅក្នុងកិច្ចប្រជុំកម្រិតខ្ពស់របស់អ.ស.ប. សម្រាប់បទឈប់បាញ់ ហើយបានប្រកាសថា«សង្រ្គាមនៅហ្គាហ្សាមិនត្រឹមតែជាសង្គ្រាមរបស់ខ្លួនប៉ុណ្ណោះទេ ប៉ុន្តែជាសង្រ្គាមរបស់ពិភពលោកសេរីទៀតផង»។
លោក អេលី ខូហិន (Eli Cohen) រដ្ឋមន្ត្រីការបរទេស ក៏បានច្រានចោលការអំពាវនាវផងដែរឱ្យមាន«សមាមាត្រ»នៅក្នុងការឆ្លើយតបរបស់ប្រទេសនេះចំពោះការវាយប្រហារដ៏ភ្ញាក់ផ្អើលរបស់ក្រុមហាម៉ាសលើអ៊ីស្រាអែលកាលពីថ្ងៃទី ៧ ខែតុលា ឆ្នាំ២០២៣ ដែលបានសម្លាប់មនុស្ស ១.៤០០ នាក់ ហើយចាប់តាំងពីពេលនោះមកបាននាំឱ្យមានការស្លាប់ជនជាតិប៉ាឡេស្ទីនជាង៥.៧០០ នាក់នៅក្នុងតំបន់ហ្គាហ្សាស្ទ្រីប។ នេះបើយោងតាមក្រសួងសុខាភិបាលរបស់ខ្លួន។
លោកខូហិន បានសួរថា «ប្រាប់ខ្ញុំតើអ្វីជាការឆ្លើយតបសមាមាត្រសម្រាប់ការសម្លាប់ទារក ការរំលោភស្ត្រី ការដុតសម្លាប់ពួកគេ ការកាត់ក្បាលកុមារ? តើអ្នកអាចយល់ព្រមបទឈប់បាញ់ជាមួយអ្នកដែលស្បថថានឹងសម្លាប់និងបំផ្លាញអត្ថិភាពរបស់អ្នកដោយរបៀបណា?»។
លោកបានប្រាប់ក្រុមប្រឹក្សាសន្តិសុខអ.ស.បថា ការឆ្លើយតបសមាមាត្រទៅនឹងការសម្លាប់រង្គាលថ្ងៃទី ៧ ខែតុលា គឺជាការបំផ្លាញទាំងស្រុងចំពោះក្រុមហាម៉ាសចុងក្រោយ ដោយហៅក្រុមជ្រុលនិយមនេះថា «ពួកណាស៊ីថ្មី»។ វាមិនត្រឹមតែជាសិទ្ធិរបស់អ៊ីស្រាអែលប៉ុណ្ណោះទេក្នុងការបំផ្លាញក្រុមហាម៉ាស។ វាជាកាតព្វកិច្ចរបស់យើង»។
លោកខូហិនបានហៅការវាយប្រហាររបស់ក្រុមហាម៉ាសថាជា ការដាស់តឿនសម្រាប់ពិភពលោកសេរីទាំងមូលប្រឆាំងនឹងភាពជ្រុលនិយម ហើយគាត់បានជំរុញឱ្យ ពិភពលោកស៊ីវិល័យឱ្យឈររួបរួមគ្នានៅពីក្រោយអ៊ីស្រាអែលដើម្បីកម្ចាត់ក្រុមហាម៉ាស។
លោកបានព្រមានថា «ថ្ងៃនេះជាអ៊ីស្រាអែល ហើយថ្ងៃស្អែកក្រុមហាម៉ាសនិងក្រុមអ្នកវាយប្រហារដទៃ នឹងនៅមាត់ទ្វាររបស់អ្នករាល់គ្នា ដោយចាប់ផ្ដើមពីលោកខាងលិច។
លោកខូហិន បានចោទប្រកាន់ប្រទេសកាតាថាបានផ្តល់ហិរញ្ញប្បទានដល់ក្រុមហាម៉ាស ហើយបាននិយាយថាជោគវាសនានៃចំណាប់ខ្មាំងជាង ២០០ នាក់ដែលត្រូវបានចាប់ចេញពីអ៊ីស្រាអែល ដែលគ្រួសារខ្លះរបស់ពួកគេបានមកចូលរួមកិច្ចប្រជុំអ.ស.ប.គឺ ស្ថិតក្នុងដៃរបស់ស្តេចរបស់ពួកគេ។
ចំណែកលោក រីយ៉ាដ អាល់-ម៉ាលីគី (Riyad al-Maliki) រដ្ឋមន្ត្រីការបរទេសប៉ាឡេស្ទីន បានទាមទារឱ្យបញ្ចប់ការវាយប្រហាររបស់អ៊ីស្រាអែល។ យើងមកទីនេះនៅថ្ងៃនេះដើម្បីបញ្ឈប់ការសម្លាប់ បញ្ឈប់…ការសម្លាប់រង្គាលដែលកំពុងបន្តប្រព្រឹត្តដោយចេតនានិងជាប្រព័ន្ធនិងយ៉ាងសាហាវដោយអ៊ីស្រាអែល ដែលជាអំណាចកាន់កាប់ប្រឆាំងនឹងប្រជាជនស៊ីវិលប៉ាឡេស្ទីន។
លោក រីយ៉ាដ អាល់-ម៉ាលីគី បន្តថា «ប្រជាជនប៉ាឡេស្ទីនជាងពីរលាននាក់កំពុងបំពេញបេសកកម្មដើម្បីមានជីវិតរស់រានជារៀងរាល់ថ្ងៃ រៀងរាល់យប់។ វាជាកាតព្វកិច្ចរបស់មនុស្សជាសមូហភាពរបស់ពួកយើងក្នុងការបញ្ឈប់ពួកគេ»។
លោកអាល់-ម៉ាលីគីបានព្រមានថា «ការវាយប្រហារនិងការសម្លាប់ព្រមទាំងអាវុធនិងសម្ពន្ធមិត្តកាន់តែច្រើននឹងមិនធ្វើឱ្យអ៊ីស្រាអែលមានសុវត្ថិភាពនោះទេ គឺមានតែសន្តិភាពប៉ុណ្ណោះទើបនាំឱ្យមានសុវត្ថិភាពពិត»៕(ប្រែសម្រួលដោយលោកសំណាង)
