ភ្នំពេញ៖ បុរសម្នាក់សង្ស័យមានវិបត្តិគ្រួរសារនិងជំងឺជាប្រចាំ បានសម្រេចចិត្តបញ្ចប់ជីវិតខ្លួន ដោយយកអំបែងកែវអារកខ្លួនឯង បណ្តាលស្លាប់ក្នុងថ្លុកឈាមបង្កការភ្ញាក់ផ្អើលទាំងព្រឹកព្រលឹម នាថ្ងៃទី២៧ ខែតុលា ឆ្នាំ២០២៣ នៅចំណុចផ្លូវលេខ១៦៩ កែងផ្លូវ១២២(ក្រោយក្រសួងការពារជាតិ) សង្កាត់មិត្តភាព ខណ្ឌ៧មករា ។
ប្រភពពីសមត្ថកិច្ចបានឱ្យដឹងថា សពឈ្មោះ ខុង រ៉ាឌី អាយុ៣៨ឆ្នាំ មុខរបរជាងភ្លើង ស្នាក់នៅបន្ទប់ជួលនៅម្តុំផ្សារតូចទួលសង្កែ មានស្រុកកំណើត នៅភូមិខ្លុយ ឃុំសូរិយូង ស្រុកតាំងគោក ខេត្តកំពង់ធំ, មានប្រពន្ធ និង កូនចំនួនពីរនាក់ ដែលកំពុងរស់ស្រុកសណ្តាន់ ខេត្តកំពង់ធំ ។
ប្រភពពត៌មានពីបងប្រុសសពរងគ្រោះបានឱ្យដឹងថា ជនរងគ្រោះមានអាការៈជម្ងឺ គេងអត់លក់ និង បានដាក់ច្បាប់នៅកន្លែងការងារចំនួនពីរថ្ងៃ គាត់ក៏ហៅឱ្យមកស្នាក់នៅផ្ទះគាត់ នៅភូមិត្រពាំងក្រសាំង ខណ្ឌពោធិ៍សែនជ័យចំនួន០៤ថ្ងៃហើយ ដេីម្បីព្យាបាលជំងឺ ហើយជនរងគ្រោះបានឈប់លេីសថ្ងៃសុំច្បាប់ចំនួនពីរថ្ងៃ ខាងក្រុមហ៊ុន បាន ខលមកសួរនាំគាត់ជាបងប្រុស ហេីយគាត់បាន ប្រាប់ពីមូលហេតុ ខាងក្រុមហ៊ុនក៏ឱ្យគាត់ទៅជួបនិយាយគ្នា ។
ប្រភពដដែលបន្តថា កាលពីព្រឹកថ្ងៃទី២៦តុលា ជនរងគ្រោះបានជិះម៉ូតូចេញពីផ្ទះជួលហើយប្រាប់ថាទៅធ្វើការ បន្ទាប់មកខាងក្រុមហ៊ុន ក៏បានទាក់ទងមកសួរគាត់វិញ ថាអត់ឃេីញជនរងគ្រោះទៅធ្វើការ គាត់ក៏ចាប់ផ្តើមសង្ស័យ ក៏ព្យាយាមទំនាក់ទំនងទៅប្អូនប្រុស ខលចូល ប៉ុន្តែមិនមានអ្នកទទួល ។
ប្រភពនៅកន្លែងកើតហេតុបានប្រាប់ឱ្យដឹងថា មុនកេីតហេតុនៅព្រឹកម៉ោង៦និង ១៥នាទី គេឃេីញជនរងគ្រោះជិះម៉ូតូម៉ាកហុងដា គុបជ្រុង ពណ៌ទឹកប៊ិច ពាក់ស្លាកលេខ ភ្នំពេញ1AF-7092 មកឈប់នៅហាងកាហ្វេមួយកន្លែង នៅក្រោយក្រសួងការពារជាតិ ផ្លូវលេខ១២២ ។
ខណៈកំពុងអង្គុយផឹកកាហ្វេក្នុងទឹកមុខសោកសៅ បុរសរងគ្រោះ ក៏បានវាយបំបែកកែវកាហ្វេ ហេីយយកអំបែងមកអារបំពង់កខ្លួនឯង បណ្តាលឱ្យឈាមស្រោចខ្លួនរបួសធ្ងន់ ។ ឃេីញអាការៈហូរឈាមស្រោចពេញខ្លួន ម្ចាស់ហាងបានដេញបុរសនោះឱ្យទៅពេទ្យ ហើយបុរសនោះក៏ដេីរយកដៃខ្ទប់ឈាម ឆ្លងកាត់សួនច្បារហាត់ប្រាណ មកដួលស្លាប់ក្នុងថ្លុកឈាម នៅលើផ្លូវលេខ១៦៩ កែងផ្លូវលេខ១២២តែម្តង។
ចំពោះមូលហេតុនៃការធ្វើអត្តឃាតរបស់ជនរងគ្រោះត្រូវ បងប្រុសបង្កើតជនរងគ្រោះបានបង្ហេីបថា «ដោយសារជំងឺប្រចាំកាយ គឺជំងឺសតិអារម្មណ៍ ដេកអត់លក់ជាច្រេីនថ្ងៃមកហេីយ និង មានបញ្ហាជាមួយគ្រួសារ ប្រពន្ធសុំលែង»។
បន្ទាប់ពីសមត្ថកិច្ចបច្ចេកទេសនិង វិទ្យាសាស្ត្របានធ្វើកោសល្យវិច័យជុំវិញកន្លែងកើតហេតុ បានបញ្ជាក់ថា«សពពិតជាស្លាប់ដោយសារធ្វើអត្តឃាត អារកសម្លាប់ខ្លួនឯងពិតប្រាកដមែន»។ បច្ចុប្បន្នសពប្រគល់ឱ្យសាច់ញាតិចាត់ចែងធ្វើបុណ្យតាមប្រពៃណី ៕(ដោយ គា សំណាង)
