បរទេស ៖ សេតវិមានបានព្រមានកាលពីថ្ងៃអាទិត្យថា «អ៊ីស្រាអែលត្រូវតែការពារអ្នកស្រុក នៅតំបន់ហ្គាហ្សាស្លូតត្រង់ ដោយបែងចែករវាងក្រុមសកម្មប្រយុទ្ធហាម៉ាសនិងជនស៊ីវិល ខណៈមេដឹកនាំពិភពលោកបានបង្កើនការអំពាវនាវឱ្យមានជំនួយមនុស្សធម៌ ដែលត្រូវការយ៉ាងខ្លាំងចូលទៅដល់ដែនដីប៉ាឡេស្ទីនដែលហែកហួរដោយសង្រ្គាម។
ទាហានអ៊ីស្រាអែលបានបង្កើន កិច្ចប្រតិបត្តិការជើងអាកាសនិងជើងគោកប្រឆាំងក្រុមហាម៉ាសនៅតំបន់ហ្កាហ្សាបន្ទាប់ពីមានការវាយប្រហារបង្ហូរឈាមដោយក្រុមសកម្មប្រយុទ្ធប៉ាឡេស្ទីនកាលពីជាងបីសប្តាហ៍មុន ដែលអាជ្ញាធរអ៊ីស្រាអែលបាននិយាយថា«សម្លាប់មនុស្សយ៉ាងតិច ១.៤០០នាក់ ដែលភាគច្រើនជាជនស៊ីវិល»។
ចំណែកក្រសួងសុខាភិបាលនៅហ្គាហ្សាស្ទ្រីបនិយាយថា ចាប់តាំងពីការវាយប្រហារថ្ងៃទី ៧ តុលាមក ជនប៉ាឡេស្ទីនជាង ៨.០០០ នាក់ត្រូវបានសម្លាប់ដោយការទម្លាក់គ្រាប់បែកសងសឹករបស់អ៊ីស្រាអែល ដែលពាក់កណ្តាលជាកុមារ។
ឯអង្គការសហប្រជាជាតិបានព្រមានកាលពីថ្ងៃអាទិត្យថា «សណ្តាប់ធ្នាប់ស៊ីវិល» កំពុងចាប់ផ្តើមដួលរលំនៅក្នុងតំបន់ហ្គាហ្សា បន្ទាប់ពីមនុស្សរាប់ពាន់នាក់បាននាំគ្នារុះរើឃ្លាំងអាហារនៅទីនោះ ដោយប្រមូលយកស្រូវសាលី ម្សៅ និងការផ្គត់ផ្គង់ផ្សេងៗទៀត។ ការបង្ហូរឈាមនេះ បានធ្វើឱ្យរដ្ឋបាលលោកបៃដិន ព្រមានអ៊ីស្រាអែលកាលពីថ្ងៃអាទិត្យថា«ពួកគេត្រូវតែការពារជីវិតជនស៊ីវិល»។
សេតវិមានបាននិយាយថា លោកចូ បៃដិន បានប្រាប់នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ នៅក្នុងការហៅតាមទូរសព្ទយ៉ាងដូច្នេះថា «ខណៈសម្ពន្ធមិត្តរបស់អាមេរិកមួយនេះ មានសិទ្ធិការពារខ្លួន ពួកគេក៏ត្រូវតែធ្វើដូច្នេះ ក្នុងលក្ខណៈស្របជាមួយនឹងច្បាប់មនុស្សធម៌អន្តរជាតិដែរ ដែលផ្តល់អាទិភាពដល់ការការពារជនស៊ីវិល»។
លោកបាននិយាយដូច្នេះ បន្ទាប់ពីទីប្រឹក្សាសន្តិសុខជាតិរបស់គាត់គឺលោក ជែក ស៊ូលលីវ៉ាន់ (Jake Sullivan) បានប្រាប់ CNN ថា «អ៊ីស្រាអែល គួរតែធ្វើគ្រប់មធ្យោបាយដែលអាចធ្វើទៅបានដើម្បីបែងចែករវាងក្រុមហាម៉ាស ដែលជាគោលដៅយោធាស្របច្បាប់ និង ជនស៊ីវិល ដែលមិនមែនជាគោលដៅស្របច្បាប់»។
លោកចូ បៃដិនក៏បាននិយាយជាមួយប្រធានាធិបតីអេហ្ស៊ីប អាប់ឌែល ហ្វាតតា អាល់-ស៊ីស៊ី (Abdel Fattah al-Sisi) ហើយមេដឹកនាំទាំងពីរ «បានប្តេជ្ញាចិត្តចំពោះការបង្កើនល្បឿនដ៏សំខាន់និងការបង្កើនជំនួយដែលហូរចូលទៅក្នុងតំបន់ហ្គាហ្សាចាប់ពីថ្ងៃនេះ»។ នេះបើយោងតាមការចេញផ្សាយពីសេតវិមាន។
លោករីស៊ី ស៊ូណាក់ នាយករដ្ឋមន្ត្រីអង់គ្លេស និងប្រធានាធិបតីបារាំង អេមម៉ានុយអែល ម៉ាក្រុង បានសង្កត់ធ្ងន់លើសារៈសំខាន់នៃការរុញជំនួយមនុស្សធម៌ជាបន្ទាន់ចូលទៅក្នុងដែនដីប៉ាឡេស្ទីន ខណៈដែលប្រធានអ.ស.បលោក អង់តូនីញ៉ូ គូថេរ៉េស បាននិយាយថា «ស្ថានភាពកាន់តែអស់សង្ឃឹមទៅៗហើយនៅត្រឹមម៉ោងនេះ»៕(ប្រែសម្រួលដោយលោកសំណាង)