បរទេស ៖ អាជ្ញាធរនៃប្រទេសបង់ក្លាដែស បានប្រកាសអំពីរចនាសម្ពន្ធប្រាក់ខែថ្មីសម្រាប់ការតវ៉ារបស់កម្មកររោងចក្រកាត់ដេរ ជាមួយនឹងការដំឡើងប្រាក់ឈ្នួលអប្បបរមាប្រចាំខែចំនួន ៥៦ភាគរយ គឺរហូតដល់ ១១៣ ដុល្លារ ដែលការពីមុនត្រឹម៧៥ ដុល្លារ, ប៉ុន្តែក្រុមកម្មករមួយចំនួនបដិសេធថា«ការដំឡើងនេះតូចពេក»។
លោកស្រី ម៉ុននូចាន ស៊ូហ្វីយ៉ាន (Monnujan Sufian) រដ្ឋមន្ត្រីក្រសួងពលកម្ម និង ការងាររដ្ឋ បានប្រកាសពីការសម្រេចចិត្តនេះកាលពីថ្ងៃអង្គារ បន្ទាប់ពីកិច្ចប្រជុំនៃក្រុមប្រឹក្សាប្រាក់ឈ្នួល ដែលបង្កើតឡើងដោយរដ្ឋាភិបាលដែលមានសមាសភាពតំណាងម្ចាស់រោងចក្រនិងកម្មករ។
លោកស្រីបន្តថា រចនាសម្ពន្ធប្រាក់ខែថ្មីនឹងចូលជាធរមានចាប់ពីថ្ងៃទី ១ ខែធ្នូឆ្នាំ២០២៣ ។ ចំណែកក្រុមអ្នករិះគន់បាននិយាយថា ថៅកែរោងចក្រដែលមានឥទ្ធិពលគួរតែធ្វើឱ្យច្រើនជាងនេះសម្រាប់កម្មករ។
ការសម្រេចចិត្តនេះបានកើតឡើងបន្ទាប់ពីការតវ៉ាហិង្សាជាច្រើនសប្តាហ៍ដោយកម្មករ ដែលទាមទារដំឡើងប្រាក់ឈ្នួលអប្បបរមាប្រចាំខែចំនួន ២០៨ ដុល្លារ។ កម្មករបានធ្វើបាតុកម្មនៅតាមដងផ្លូវ វាយប្រហាររោងចក្រ វាយតប់ជាមួយប៉ូលិស និង ដុតរថយន្ត។
ចំណែកការតវ៉ាបានចាប់ផ្តើមបន្ទាប់ពីសមាគមរោងចក្រកាត់ដេរនិងអ្នកនាំចេញរបស់បង់ក្លាដែស ស្នើដំឡើងប្រាក់ឈ្នួលអប្បបរមាប្រចាំខែ ២៥ភាគរយគឺស្មើនឹង ៩០ ដុល្លារ។ ការដំឡើងប្រាក់ឈ្នួលអប្បបរមាចុងក្រោយនេះត្រូវបានប្រកាសក្នុងឆ្នាំ ២០១៨៕(ប្រែសម្រួលដោយ លោកសំណាង)