ភ្នំពេញ ៖ ឯកឧត្តមកែវ រតនៈ រដ្ឋមន្រ្តីក្រសួងរ៉ែ និងថាមពល បានបង្ហាញពីផែនការក្នុងការគ្រប់គ្រងការប្រើប្រាស់ថាមពលអគ្គិសនីដោយទប់ស្កាត់ ការនាំចូលឧបករណ៍អគ្គិសនីដែលស៊ីភ្លើងច្រើនមកទីផ្សារក្នុងស្រុក ដែលការអះអាងបែបនេះក្នុងវេទិកាពិភាក្សាស្តីពី «គោលនយោបាយរ៉ែ និងថាមពលនៅកម្ពុជា»។
ថ្លែងនៅក្នុងសន្និសីទក្នុងវេទិការពិសេសដែលរៀបចំឡើងដោយក្លិបអ្នកកាសែតកម្ពុជា កាលពីព្រឹកថ្ងៃទី២១វិច្ឆិកាឆ្នាំ២០២៣ ឯកឧត្តមកែវ រតនៈ រដ្ឋមន្រ្តីក្រសួងរ៉ែនិងថាមពលបានបញ្ជាក់ថា «ការចាត់វិធានការទប់ស្កាត់ការនាំចូលឧបករណ៍ដែលស៊ីភ្លើងច្រើន ដើម្បីរួមចំណែកគ្រប់គ្រងការប្រើប្រាស់ថាមពលឱ្យមានប្រសិទ្ធភាព»។
ឯកឧត្តមបន្តថា រដ្ឋាភិបាលបានដាក់ផែនការឆ្នាំ ២០២៣ ទៅ ២០៣០ កាត់បន្ថយការប្រើប្រាស់អគ្គិសនីប្រហែលឱ្យបាន១៩ភាគរយ ស្មើ២០០០មេហ្គាវ៉ាត់។ ការទប់ស្កាត់បានជោគជ័យអាចធ្វើឱ្យកម្ពុជាមិនបាច់បង្កើតរោងចក្រថ្មីផលិតថាមពលថ្មី បន្ថែមចំនួន ២០០០ មេហ្គាវ៉ាត់ ដែលនឹងចូលរួមកិច្ចការពារបរិស្ថានទៀតផង។
ក្រៅពីលើកពីគម្រោងការហាមឃាត់ការនាំចូលឧបករណ៍ដែលស៊ីភ្លើងច្រើន ឯកឧត្តមរដ្ឋមន្រ្តី ចង់ឱ្យពលរដ្ឋប្រើប្រាស់ថាមពលដោយសន្សំសំចៃ ដើម្បីចូលរួមចំណែកសម្រេចបានគោលដៅការប្រើប្រាស់ថាមពលឱ្យមានប្រសិទ្ធភាពនៅកម្ពុជា៕(ដោយ ប៉ូច គឹមសុខ)
