ភ្នំពេញ ៖ ផ្ទះចំនួន០២ល្វែងជាប់គ្នាត្រូវបានឆ្លងចរន្តអគ្គិសនីបង្កជាអណ្ដាតភ្លើងឆេះរាលដាលពេញកន្លែងលក់ធុងបាស់ ខូចខាតសម្ភារស្ទើរតែទាំងស្រុង កើតឡើងនាវេលាម៉ោង ១០និង៣០នាទីព្រឹក នៅចំណុចផ្ទះលេខ ៥៣អាបេ ផ្លូវលេខ៣៣៨ សង្កាត់ទួលស្វាយព្រៃ២ ខណ្ឌបឹងកេងកង រាជធានីភ្នំពេញ។
សមត្ថកិច្ចនិយាយថា ម្ចាស់ទីតាំងឈ្មោះ លឹម ម៉េងហៃ ភេទប្រុស អាយុ៦៣ឆ្នាំ ជនជាតិ ខ្មែរ មុខរបរអ្នកលក់ធុងបាស ។ ប្រភេទសំណង់សំណង់ដែរឆាបឆេះ ជាប្រភេទថ្មបេតុង ទំហំ ១០ម៉ែត្រគុណនឹង២៥ម៉ែត្រ។ ឆេះខូចខាតសម្ភារ ឆេះផ្ទះល្វែងជាន់ផ្ទាល់ដី ចំនួន ០២ល្វែង រួមមានម៉ូតូចំនួន ០២គ្រឿង ,ធុងបាស ៤០គ្រឿង, សម្ភារប្រើប្រាស់ប្រចាំថ្ងៃអស់មួយចំនួន និងពុំបានឆេះរាលដាលដល់អ្នកក្បែរខាងឡើយ ។
ក្នុងហេតុការណ៍នោះបង្កឱ្យមន្ត្រីពន្លត់អគ្គិភ័យម្នាក់រងរបួសស្រាល, ចំពោះមូលហេតុម្ចាស់ផ្ទះ បានប្រាប់អោយដឹងថា «បណ្តាលមកពីឆ្លងចរន្តអគ្គិសនី ពីបង្គោលភ្លើង រាលដាលមកក្នុងផ្ទះគាត់»។ ចំពោះមូលហេតុពិតប្រាកដសមត្ថកិច្ចជំនាញកំពុងស្រាវជ្រាវ។
សមត្ថកិច្ចប្រេីប្រាស់រថយន្ត បង្ការនិងពន្លត់អគ្គិភ័យចំនួន ១៩គ្រឿង ប្រេីប្រាស់ទឹកអស់ចំនួន ១៩ឡានស្មើនឹង៧៦ម៉ែត្រគូប ហើយពន្លត់ចប់ នៅម៉ោង ១២ថ្ងៃត្រង់ នាថ្ងៃខែ ឆ្នាំដដែល៕
