ភ្នំពេញ ៖ ឯកឧត្តមប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាអ្នកនាំពាក្យរាជរដ្ឋាភិបាល នៅព្រឹកថ្ងៃទី៧ ខែធ្នូឆ្នាំ២០២៣ បានអញ្ជើញជាវាគ្មិន ក្នុងកិច្ចពិភាក្សាតុមូលលើប្រធានបទ «សេរីភាពបញ្ចេញមតិ និងការទទួលខុសត្រូវ» ដែលរៀបចំដោយក្លិបអ្នកកាសែតកម្ពុជា នៅអគារ DIAMOND BUSINESS CENTER កោះពេជ្រ។
![](https://www.bbn-tv.cc/wp-content/uploads/2023/12/Untitled3560_20231208064956.png)
នៅក្នុងពិធីនេះ ក៏មានការធ្វើបទបង្ហាញដោយ លោក ប៉ា ប៉ុណ្ណារ៉ាដា អ្នកនាំពាក្យគណៈកម្មាធិការសិទ្ធិមនុស្សកម្ពុជា,លោក ពុយ គា ប្រធានក្លិបអ្នកកាសែតកម្ពុជា , លោក Pierre Gillette អតីតអ្នកសារព័ត៌មានជេីងចាស់មកពីប្រទេសបារាំង និងលោក Digby James WREN អ្នកស្រាវជ្រាវជនជាតិអូស្ត្រាលី ដើម្បីចែករំលែកព័ត៌មានស្ដីពី«សិទ្ធិសេរីភាពបញ្ចេញមតិ និងការទទួលខុសត្រូវនៅក្នុងប្រទេស និងបណ្ដាប្រទេស ទ្វីបដែលពួកគេរស់នៅរៀងៗខ្លួន» ។
![](https://www.bbn-tv.cc/wp-content/uploads/2023/12/Untitled3560_20231208064905.png)
វេទិកានេះ ក៏ត្រូវបានធ្វើឡើងស្របពេលនឹងការខិតជិតចូលដល់ទិវាសិទ្ធិមនុស្សអន្តរជាតិលើកទី៧៥ (១០ធ្នូ )ដែលប្រធានបទខាងលើ មានគោលបំណងលើកកម្ពស់សិទ្ធិសេរីភាពក្នុងការបញ្ចេញមតិតាមរយៈការបង្កើនការទទួលខុសត្រូវ និងការគោរពសិទ្ធិគ្នាទៅវិញទៅមក ដើម្បីកសាងសង្គមមួយដែលមានលក្ខណៈស៊ីវីល័យ និងសុខដុមរមនា។
![](https://www.bbn-tv.cc/wp-content/uploads/2023/12/IMG_4546-1024x682.jpeg)
លោក ពុយ គា ប្រធានក្លឹបអ្នកកាសែតកម្ពុជា បានអំពាវនាវដល់អាជ្ញាធរឱ្យបើកលំហដល់អ្នកសារព័ត៌មានមកពីគ្រប់ស្ថាប័នទាំងអស់ ចូលយកព័ត៌មាននៅតាមក្រសួងស្ថាប័នរដ្ឋដោយគ្មានការរារាំង។ ក្លឹបអ្នកកាសែតកម្ពុជានឹងធ្វើការសម្របសម្រួលជាមួយអ្នកសារព័ត៌មានទាំងអស់ដែលជួបបញ្ហាទាំងនេះ៕(ដោយ ប៉ូច គឹមសុខ)
![](https://www.bbn-tv.cc/wp-content/uploads/2023/12/Untitled3560_20231208065019.png)