បរទេស ៖ រថក្រោះអ៊ីស្រាអែលបានចូលដល់កណ្តាលបេះដូងទីក្រុង Khan Younis កាលពីថ្ងៃអាទិត្យ (១០ ធ្នូ) នៅក្នុងការរុលទៅមុខថ្មីដ៏សំខាន់ចូលទៅក្នុងទីក្រុងសំខាន់នៃភាគខាងត្បូងហ្គាហ្សាស្ទ្រីប ខណៈដែលអាជ្ញាធរសុខាភិបាលនៅហ្គាហ្សាហាម៉ាសបាននិយាយថា ប្រជាជនប៉ាឡេស្ទីនប្រហែល ១៨.០០០ នាក់ត្រូវបានសម្លាប់នៅក្នុងសង្គ្រាម។
ក្រុមមេដឹកនាំអ៊ីស្រាអែលបាននិយាយថា យុទ្ធជនហាម៉ាសរាប់សិបនាក់បានចុះចាញ់ ដោយលើកទឹកចិត្តពួកគេឱ្យធ្វើដូច្នេះ ប៉ុន្តែក្រុមសកម្មប្រយុទ្ធប៉ាឡេស្ទីនបានបដិសេធ ដោយហៅការអះអាងនេះថា «មិនពិតនិងគ្មានមូលដ្ឋាន»។
អ្នកស្រុកនៅក្រុង Khan Younis បាននិយាយថា រថក្រោះបានទៅដល់ផ្លូវសំខាន់ពីភាគខាងជើងទៅខាងត្បូងឆ្លងកាត់ទីក្រុងបន្ទាប់ពីការប្រយុទ្ធគ្នាពេញមួយយប់ ដែលបានពន្យឺតការរុលទៅមុខរបស់អ៊ីស្រាអែលពីភាគខាងកើត។យន្តហោះចម្បាំងកំពុងវាយលុកតំបន់ភាគខាងលិច។ នៅលើមេឃគឺមានសំឡេងផ្ទុះឥតឈប់ឈរនិងផ្សែងយ៉ាងក្រាស់បានហុយពេញទីក្រុងដែលមានមនុស្សច្រើនកុះករ ដែលភៀសខ្លួនពីកន្លែងផ្សេងក្នុងតំបន់។
អគ្គលេខាធិការអង្គការសហប្រជាជាតិ លោក អង់តូនីញ៉ូ គូថេរ៉េស ដែលមិនបានជោគជ័យក្នុងការជំរុញឱ្យមានបទឈប់បាញ់នៅហ្គាហ្សា បាននិយាយថា តំបន់ឡោមព័ទ្ធនេះកំពុងដួលរលំ។ គាត់បាននិយាយថា «ខ្ញុំរំពឹងថាសណ្តាប់ធ្នាប់សាធារណៈនឹងដួលរលំទាំងស្រុងក្នុងពេលឆាប់ៗនេះ ហើយស្ថានភាពកាន់តែអាក្រក់អាចកើតមានឡើង រួមទាំងជំងឺរាតត្បាត និងការកើនឡើងសម្ពាធសម្រាប់ការផ្លាស់ទីលំនៅដ៏ធំទៅកាន់ប្រទេសអេហ្ស៊ីប»។
នៅព្រឹកថ្ងៃអាទិត្យ នៅជិតប៉ុស្តិ៍ប៉ូលិសកណ្តាលទីក្រុង សំឡេងកាំភ្លើងយន្តអាចស្តាប់ឮយ៉ាងច្បាស់។ ផ្លូវនៅទីនោះមានភាពស្ងាត់ជ្រងំ ខណៈមានតែស្ត្រីចំណាស់ម្នាក់និងក្មេងស្រីម្នាក់ជិះរទេះលា។
ឪពុកកូនបួន ដែលផ្លាស់ទីលំនៅពីទីក្រុង Gaza City និងទីជម្រកនៅទីក្រុង Khan Younis បានប្រាប់ទីភ្នាក់ងារសារព័ត៌មានរ៉យទ័រថា «វាជាយប់ដ៏គួរឱ្យភ័យខ្លាចបំផុត ការតស៊ូគឺខ្លាំងក្លាណាស់ យើងអាចឮសំឡេងកាំភ្លើង និងការផ្ទុះមិនឈប់រាប់ម៉ោង»។លោកបដិសេធមិនបញ្ចេញអត្តសញ្ញាណទេព្រោះខ្លាចមានការសងសឹក៕(ប្រែសម្រួលដោយលោកសំណាង)
