ភ្នំពេញ ៖ ជនសង្ស័យ០៤នាក់ ត្រូវបានសមត្ថកិច្ចស្រាវជ្រាវបង្ក្រាបបាន ជាបន្តបន្ទាប់ និងដកហូតថ្នាំញៀន រាប់សិបគីឡូក្រាម ជាមួយវត្ថុតាងសន្ឋឺកសន្ធាប់ ក្រោយចាប់ខ្លួនជនសង្ស័យ០២នាក់ ជំនាញលក់ថ្នាំញៀន នៅផ្លូវ៦០ម៉ែត្រ ។
ថ្លែងក្នុងអង្គសន្និសីទសារព័ត៌មាន នារសៀលថ្ងៃទី២០ ខែធ្នូ ឆ្នាំ២០២៣ នៅមន្ទីរប្រឆាំងបទល្មើសគ្រឿងញៀន នៃអគ្គស្នងដ្ឋាននគរបាលជាតិ បានបង្ហាញថា «សមត្ថកិច្ចបានឃាត់ខ្លួនជនសង្ស័យចំនួន៤នាក់ ពីបទ កែច្នៃ ផលិត រក្សាទុកនិងជួញដូរនូវសារធាតុញៀនដោយខុសច្បាប់»។
លោកឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន បានថ្លែងប្រាប់ឲ្យដឹងថា ដោយអនុវត្តតាមបទបញ្ជាពីនាយឧត្តមសេនីយ៍ ស ថេត អគ្គស្នងការនគរបាលជាតិ នាយឧត្តមសេនីយ៍ ម៉ក់ ជីតូ អគ្គស្នងការរង និងលោកឧត្តមសេនីយ៍ឯក ព្រុំ សន្ធរ អគ្គស្នងការរងទទួលផែនប្រឆាំងគ្រឿងញៀននោះ កាលពីថ្ងៃទី១០ ខែធ្នូ ឆ្នាំ២០២៣មានប្រជាពលរដ្ឋល្អ បានមករាយការណ៍ ជូនមន្ត្រីនគរបាលប្រឆាំងបទល្មើសគ្រឿងញៀន (ក១១) ថា មានមុខសញ្ញាតែងតែប្រព្រឹត្តសកម្មភាពជួញដូរ សារធាតុញៀន នៅចំណុចតាមបណ្ដោយផ្លូវ៦០ម៉ែត្រ ស្ថិតក្នុងភូមិព្រែកតាឡុង៣សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ដែលមានមធ្យោបាយធ្វើដំណើរ ម៉ូតូ១គ្រឿង ម៉ាក SUZUKI VIVA ពណ៌ខ្មៅ ផ្លាកលេខ ភ្នំពេញ 1AH-5938 ។
លោកឧត្តមសេនីយ៍ឯក បានបន្តថាលុះដល់វេលាម៉ោង៦ល្ងាច ថ្ងៃទី១៩ ខែធ្នូ ឆ្នាំ២០២៣ កម្លាំងជំនាញ បានឃ្លាំមើល ក៏ប្រទះឃើញជនសង្ស័យ២នាក់ ជិះម៉ូតូ១គ្រឿង ភិនភាគដូចប្រជាពលរដ្ឋបានរាយការណ៍ ទើបឃាត់ខ្លួន ហើយពិនិត្យឃើញសារធាតុញៀនមួយចំនួន ។
ជានីតិវិធី វេលាយប់ថ្ងៃដដែល សមត្ថកិច្ចក៏ឈានបន្តឃាត់ខ្លួនជនសង្ស័យម្នាក់ទៀត នៅចំណុចបុរីវីឡាថោន មុខផ្ទះលេខ L-65 ផ្លូវលេខ V-16 ស្ថិតក្នុងភូមិទួលរការ សង្កាត់ចាក់អង្រែក្រោម និងជនសង្ស័យម្នាក់ទៀត នៅចំណុចមុខបុរីវីឡាថោន ផ្លូវ៣០ម៉ែត្រ ទើបឆែកឆេរផ្ទះលេខ L-65 ។
ជាលទ្ធផល សមត្ថកិច្ចឃាត់ខ្លួនជនសង្ស័យប្រុសបានចំនួន៤នាក់ ក្នុងរួមមាន ៖ ១-ឈ្មោះ ឡេ មិនហ៊ុយ ជាជនជាតិវៀតណាម ។ ២- ឈ្មោះ ចឹង ង៉ុកហ្វាក ជាជនជាតិវៀតណាម ។ ៣- ឈ្មោះ ជា ជេក (XIE JIE) ជាជនជាតិចិន និង៤- ឈ្មោះ ភី ភី (PEI PEI) ជាជនជាតិចិន ។ ចំណែកវត្ថុតាងដែលចាប់យក រួមមាន ៖ ១- សារធាតុញៀនសុទ្ធចំនួន៥៨គីឡូ២២៤ ក្រាម ។ ២- សារធាតុមិនច្បាស់លាស់សម្រាប់ផលិតគ្រឿងញៀនជាង៣០០គីឡូក្រាម។ ៣- ម៉ាស៊ីនកែច្នៃសម្រាប់ផលិតគ្រឿងញៀនចំនួន២គ្រឿង ។ ៤- ម៉ូតូចំនួន៣គ្រឿង ។ និង៥- ទូរស័ព្ទចំនួន៤គ្រឿង ។
ក្រោយពីបង្ហាញមុខជនសង្ស័យទាំង៤នាក់ រួមទាំងវត្ថុតាងខាងលើនេះហើយ ជនសង្ស័យត្រូវបានសមត្ថកិច្ចកសាងសំណុំរឿង រួចបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធីនៃច្បាប់ ៕ (ដោយ ៖សំណាង៩៦)