ភ្នំពេញ ៖ មានករណីគ្រោះអគ្គីភ័យមួយកន្លែងបានកើតឡើងនៅចំណុចរោងចក្រកាត់ដេរ តាមបណ្តោយផ្លូវបេតុង ភូមិតាលី សង្កាត់-ខណ្ឌដង្កោ រាជធានីភ្នំពេញ នៅវេលាម៉ោង ១១និង៥០ នាទីព្រឹក ថ្ងៃអង្គារ ទី០២ ខែមករា ឆ្នាំ២០២៤នេះមូលហេតុបណ្តាលមកពីឆ្លងកំដៅចេញពីឡដុតចំហាយបង្កជាអគ្គិភ័យ។
សមត្ថកិច្ចនិយាយថា ម្ចាស់ទីតាំង ឈិន ផាន់ ភេទប្រុស អាយុ៤៧ឆ្នាំ ជនជាតិខ្មែរ មុខរបរ ម្ចាស់រោងចក្រ ។ ប្រភេទសំណង់ដែលឆេះ សង់អំពីថ្មីប្រក់ស័ង្កសី ទំហំ ៥០គុណនឹង១០០ម៉ែត្រ បណ្តាលឱ្យឆេះសំយាបដំបូលដែកប្រក់ស័ង្កសីទំហំ ០៥ម៉ែត្រគុណនឹង២០ម៉ែត្រ អស់មួយចំហៀង រួមទាំងម៉ូតូចំនួន ៣០ គ្រឿង និងឡដុតចំហាយចំនួន០១ឡ ហើយពុំបានឆេះរាលដាលដល់អ្នកក្បែរខាងឬរបួសដល់មនុស្ដឡើយ ។
ភ្លាមនោះកងកម្លាំងបង្ការពន្លត់អគ្គិភ័យនិងសង្គ្រោះរថយន្តការិយាល័យអគ្គិភ័យចំនួន ០៦ គ្រឿង ប្រេីប្រាស់ទឹកអស់ចំនួន ០៧ រថយន្ត ស្មើរនឹង ២៨ ម៉ែត្រគូប និងរថយន្តជំនួយអន្តរាគមន៍ មានរថយន្តពន្លត់អគ្គិភ័យក្រុមហ៊ុនស្រាបៀរកម្ពុជាចំនួន ០១ គ្រឿង ប្រើប្រាស់អស់ចំនួន ០១ រថយន្ត ស្មើនឹង ០៦ ម៉ែត្រគូប ហើយពន្លត់ចប់នៅវេលាម៉ោង១២និង៥៥ នាទីថ្ងៃត្រង់ នាថ្ងៃខែ ឆ្នាំដដែល៕(ដោយ ប៉ូច គឹមសុខ)