ថៃ ៖ គូស្នេហ៍មួយគូនៅក្នុងប្រទេសថៃត្រូវបានចោទប្រកាន់ពីបទលាក់សាកសពកុមារ ដែលទើបចេះដើរតេះតះនៅក្នុងទូទឹកកក។
កាសែតបាងកកប៉ុស្តិ៍បានរាយការណ៍ថា សាកសពក្មេងប្រុសអាយុ ២ ឆ្នាំម្នាក់ត្រូវបានគេរកឃើញកាលពីថ្ងៃសៅរ៍នៅក្នុងទូទឹកកកនៅផ្ទះក្នុងស្រុក Bang Bua Thong នៃខេត្ត Nonthaburi ។
លោក Harnnarong Praiphanom អាយុ ៣១ ឆ្នាំ និងប្រពន្ធរបស់គាត់ឈ្មោះ Marisa Thong-iam អាយុ ២៥ ឆ្នាំត្រូវបានចោទប្រកាន់ថាមិនបានរាយការណ៍ពីការស្លាប់របស់ទារកទើបចេះដើរតេះតះទៅប៉ូលិសនិងលាក់សាកសព។លោក Harnnarong ក៏ត្រូវបានចោទប្រកាន់ពីបទល្មើសគ្រឿងញៀនផងដែរ។
ប្រព័ន្ធផ្សព្វផ្សាយថៃបានរាយការណ៍ថា លោក Harnnarong ជាមិត្តភក្តិរបស់ឪពុកក្មេងនេះ។ លោក Preut Chamroonsart នាយប៉ុស្តិ៍នគរបាល Bang Bua Thong បានប្រាប់អ្នកសារព័ត៌មានថា ប៉ូលិសនឹងសាកសួរឪពុកម្តាយបង្កើតរបស់ក្មេងប្រុសនេះ។
មន្ត្រីប៉ូលិស អ្នកជំនាញផ្នែកកោសល្យវិច្ច័យ និងក្រុមគ្រូពេទ្យត្រូវបានហៅទៅកាន់លំនៅដ្ឋានមួយនៅផ្លូវRattanathibet កាលពីថ្ងៃសៅរ៍។
យោងតាមរបាយការណ៍ពី Thai PBS World បានឱ្យដឹងថា អាជ្ញាធរបានទៅផ្ទះនោះបន្ទាប់ពីម្តាយរបស់Harnnarong បានត្អូញត្អែរពីក្លិនស្អុយដែលភាយចេញពីផ្ទះនោះ ហើយថាកុមារបានបាត់ខ្លួនតាំងពីថ្ងៃទី ២ ខែមករា។
កាសែតបាងកកប៉ុស្តិ៍បានរាយការណ៍ថា ក្រុមមន្ត្រីបានរកឃើញសាកសពរបស់ក្មេងទើបចេះដើរតេះតះរុំក្នុងភួយហើយដាក់ក្នុងទូទឹកកក។
លទ្ធផលនៃការធ្វើកោសល្យវិច្ច័យកាលពីថ្ងៃអាទិត្យបានបញ្ជាក់ថា ក្មេងប្រុសបានឆ្លាក់បាយដំណើបស្លាប់។ សាកសពក្មេងប្រុសនេះត្រូវបានបូជានៅថ្ងៃចន្ទ៕(ប្រែសម្រួលដោយ លោកសំណាង)
