ព្រះសីហនុ ៖ មានករណីអគ្គីភ័យឆាបឆេះរថយន្តមួយគ្រឿងសល់តែគ្រោងឆ្អឹង រងការខូចខាតទាំងស្រុង តាមផ្លូវទៅអូរត្រេះ ក្នុងសង្កាត់លេខ៤ ក្រុងព្រះសីហនុ នាវេលាម៉ោង១១និង៣០នាទីថ្ងៃត្រង់ថ្ងៃទី២៣ ខែមករា ឆ្នាំ២០២៤។
បើតាមសមត្ថកិច្ចចុះទៅអន្តរាគមន៍ប្រាប់ថា ក្រៅពីរថយន្តរងការខូចខាត មិនមានមនុស្សរងគ្រោះថ្នាក់ទេ និងថាភ្លាមៗមិនទាន់ដឹងមូលហេតុនៅឡើយ។
រថយន្តដែលឆេះម៉ាក MERCEDES BENZ V250 ពណ៌ខ្មៅ មានស្លាកលេខ ភ្នំពេញ 2BN-5585 ត្រូវបានអគ្គិភ័យឆាបឆេះ សល់តែគ្រោងដែក ។ ម្ចាស់ឡានរងគ្រោះឈ្មោះ សួរ ឌីណា ភេទ ប្រុស អាយុ ៤១ ឆ្នាំ ជនជាតិខ្មែរ មានស្រុកកំណើតនៅ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
ករណីអគ្គិភ័យខាងលើនេះ កម្លាំងសមត្ថកិច្ច នៃការិយាល័យបង្ការពន្លត់អគ្គិភ័យនិងសង្គ្រោះ របស់ស្នងការដ្ឋាននគរបាលខេត្តព្រះសីហនុ បានចេញរថយន្តពន្លត់អគ្គិភ័យចំនួន ០១ គ្រឿង និងបានប្រើប្រាស់ទឹកអស់ចំនួន ០១ រថយន្ត៕(ដោយ គា សំណាង)