បរទេស ៖ ទីភ្នាក់ងារសារព័ត៌មានរ៉យទ័របានរាយការណ៍កាលពីថ្ងៃអង្គារ ទី២៣ មករាថា កិច្ចខិតខំប្រឹងប្រែងសម្រុះសម្រួលអន្តរជាតិយ៉ាងខ្លាំងក្លាកំពុងធ្វើការឆ្ពោះទៅរកការដោះដូរចំណាប់ខ្មាំងអ៊ីស្រាអែលសម្រាប់អ្នកទោសប៉ាឡេស្ទីនក្នុងអំឡុងពេលបទឈប់បាញ់រយៈពេលមួយខែដែលបានស្នើឡើងនៅតំបន់ហ្គាហ្សា ខណៈសេតវិមានបាននិយាយថា «បេសកជនរបស់ខ្លួនកំពុងមានការពិភាក្សាយ៉ាងសកម្មលើបញ្ហានេះ»
ប្រភពបាននិយាយថា ប្រទេសកាតា សហរដ្ឋអាមេរិក និងអេហ្ស៊ីបបានបើកការងារការទូតចាប់តាំងពីថ្ងៃទី ២៨ ខែធ្នូឆ្នាំ២០២៣ ហើយអ៊ីស្រាអែល និងក្រុមហាម៉ាស បានយល់ព្រមជាគោលការណ៍ចំពោះផែនការក្របខណ្ឌនេះ។ ប្រភពបាននិយាយថា ការងារការទូតនេះកំពុងត្រូវបានគាំងដោយការខ្វែងគំនិតគ្នារបស់ភាគីទាំងពីរអំពីរបៀបដើម្បីបញ្ចប់ជាអចិន្ត្រៃយ៍ចំពោះសង្រ្គាមនៅហ្គាហ្សា។
ក្រសួងការបរទេសសហរដ្ឋអាមេរិក និងសេតវិមាន ក្រសួងការបរទេសកាតា និងសេវាព័ត៌មានរដ្ឋរបស់អេហ្ស៊ីបមិនបានឆ្លើយតបភ្លាមៗចំពោះសំណើសុំការអត្ថាធិប្បាយលើរបាយការណ៍របស់រ៉យទ័រនោះទេ។
កាលពីថ្ងៃចន្ទម្សិលមិញ អ៊ីស្រាអែលបានទទួលរងការបាត់បង់ទាហានដ៏អាក្រក់បំផុតក្នុងការប៉ះទង្គិចគ្នារយៈពេលជាងបីខែ ដោយមានទាហានស្លាប់ ២៤ នាក់ក្នុងឧបទ្ទវហេតុពីរផ្សេងគ្នា។ មន្ត្រីអ៊ីស្រាអែលបានរំលឹកឡើងវិញថាគោលបំណងនៃសង្គ្រាមរបស់ខ្លួនប្រឆាំងនឹងចលនាហាម៉ាសប៉ាឡេស្ទីន ដែលដំណើរការតំបន់ហ្គាហ្សាគឺមិនផ្លាស់ប្តូរទេ ហើយកិច្ចខិតខំប្រឹងប្រែងកំពុងត្រូវបានធ្វើឡើងដើម្បីដោះលែងចំណាប់ខ្មាំងជាង ១០០ នាក់។
នាយករដ្ឋមន្ត្រី Benjamin Netanyahu បាននិយាយថា «ក្នុងនាមវីរបុរសរបស់យើង ដើម្បីជាប្រយោជន៍ដល់ជីវិតរបស់យើង យើងនឹងមិនបញ្ឈប់ការប្រយុទ្ធរហូតដល់ការទទួលជ័យជម្នះដាច់ខាត»៕(ប្រែសម្រួលដោយ លោកសំណាង)