បរទេស ៖ អង្គការសហប្រជាជាតិ(អ.ស.ប.)បាននិយាយកាលពីថ្ងៃពុធទី ២៤ ខែមករាឆ្នាំ២០២៤ថា «រថក្រោះរបស់អ៊ីស្រាអែលបានវាយប្រហារបរិវេណអ.ស.បដ៏ធំនៅក្នុងតំបន់ហ្គាហ្សា ដែលផ្តល់ជម្រកដល់ប្រជាជនប៉ាឡេស្ទីន ដែលបណ្តាលឱ្យ «ស្លា.ប់បាត់បង់ជីវិតដ៏ច្រើន»ប៉ុន្តែអ៊ីស្រាអែលបានបដិសេធថា «កងកម្លាំងរបស់ខ្លួនមិនទទួលខុសត្រូវទេ»ហើយបានលើកឡើងថា «ក្រុមហាម៉ាសប្រហែលជាបានបាញ់ផ្លោងចូល»។
ការវាយប្រហារ ដែលអ.ស.ប និយាយថាបានវាយប្រហារលើបរិវេណបណ្តុះបណ្តាលវិជ្ជាជីវៈដែលផ្តល់ជម្រកដល់ជនភៀសខ្លួនចំនួន ៣០.០០០ នាក់នៅក្នុងទីក្រុង Khan Younis ភាគខាងត្បូងទីក្រុងសំខាន់របស់ហ្គាហ្សា បានជំរុញឱ្យមានការថ្កោលទោសយ៉ាងកម្រពីសហរដ្ឋអាមេរិក។
អ្នកសម្របសម្រួលផ្នែកមនុស្សធម៌របស់អ.ស.បសម្រាប់ដែនដីប៉ាឡេស្ទីន លោក James McGoldrick បាននិយាយថា «ការស្លាប់និងរបួសជាច្រើនបានកើតឡើង អគារមួយចំនួនត្រូវបានឆាបឆេះ និងមានរបាយការណ៍អំពីអ្នកស្លាប់ជាច្រើនទៀត។ មនុស្សជាច្រើនបានព្យាយាមរត់គេចពីកន្លែងកើតហេតុ ប៉ុន្តែមិនអាចធ្វើដូច្នេះបានទេ»។
លោក Thomas White នាយកកិច្ចការហ្គាហ្សាសម្រាប់ទីភ្នាក់ងារ UNRWA របស់អ.ស.ប បាននិយាយថា រថក្រោះចំនួនពីរបានវាយប្រហារទៅលើអគារមួយក្នុងចំណោមអគារជាច្រើនរបស់ទីភ្នាក់ងារនេះ ដែលមានមនុស្សផ្លាស់ទីលំនៅប្រហែល ៨០០ នាក់កំពុងស្នាក់នៅ។ យ៉ាងហោចណាស់មនុស្ស ៩ នាក់បានស្លាប់ និង ៧៥ នាក់រងរបួស។ប្រធានទីភ្នាក់ងារលោក Philippe Lazzarini បាននិយាយថាចំនួនអ្នកស្លាប់ប្រហែលជាខ្ពស់ជាងនេះ។
លោក Lazzarini បានបង្ហោះថា «បរិវេណនេះគឺជាកន្លែងដែលត្រូវបានសម្គាល់យ៉ាងច្បាស់ថាជារបស់អង្គការសហប្រជាជាតិ ហើយទីតាំងរបស់វាត្រូវបានចែករំលែកជាមួយអាជ្ញាធរអ៊ីស្រាអែល ដូចដែលយើងបានធ្វើសម្រាប់ទីតាំងទាំងអស់របស់យើង។ ជាថ្មីម្តងទៀតនេះជាការមិនយកចិត្តទុកដាក់ចំពោះច្បាប់សង្គ្រាមជាមូលដ្ឋាន»។
នៅទីក្រុងវ៉ាស៊ីនតោន អ្នកនាំពាក្យក្រសួងការបរទេសសហរដ្ឋអាមេរិក លោក Vedant Patel បាននិយាយថា«យើងមិនពេញចិត្តចំពោះការវាយប្រហារនៅថ្ងៃនេះលើមជ្ឈមណ្ឌលបណ្តុះបណ្តាល Khan Younis របស់អង្គការសហប្រជាជាតិនោះទេ»។
លោក Patel បាននិយាយថា «ជនស៊ីវិលត្រូវតែត្រូវបានការពារ ហើយចរិតដែលត្រូវបានការពារនៃទីកន្លែងរបស់អង្គការសហប្រជាជាតិ ត្រូវតែគោរព ហើយបុគ្គលិកមនុស្សធម៌ ត្រូវតែត្រូវបានការពារ ដូច្នេះពួកគេអាចបន្តផ្តល់ជំនួយមនុស្សធម៌សង្គ្រោះជីវិតដល់ជនស៊ីវិល ដែលពួកគេត្រូវការ»៕(ប្រែសម្រួលដោយ លោកសំណាង)
