ភ្នំពេញ ៖ រថយន្ត HILUX REVO ពាក់ស្លាកលេខភ្នំពេញ 2AQ-1520 ដែលបើកបុកមនុស្សមួយគ្រួសារ៣នាក់ឪពុកនិងកូនប្រុសស្រី២នាក់កំពុងជិះម៉ូតូឌុបគ្នាតាមផ្លូវ បណ្ដាលឱ្យកូនស្រីវ័យ១១ឆ្នាំម្នាក់បាត់បង់ជីវិត នៅផ្លូវ៦០ម៉ែត្រ ខណ្ឌដង្កោនោះ ត្រូវបានសមត្ថកិច្ចរកឃើញហើយ នៅចំណតមុខអគារខុនដូ R&F ផ្លូវ៦០ម៉ែត្រ សង្កាត់ចាក់អង្រែលើ ខណ្ឌមានជ័យ នាព្រឹកថ្ងៃទី១៣ ខែកុម្ភៈ ឆ្នាំ២០២៤នេះ, តែម្ចាស់រថយន្តមិនទាន់រកឃេីញទេ តែសមត្ថកិច្ចបានកំណត់មុខសញ្ញាបានហើយ ។
សមត្ថកិច្ចនិយាយថា បុរសជាឪពុកម្នាក់ជិះម៉ូតូម៉ាកគុបស៊េរីចាស់ ដឹកកូនប្រុសស្រី២នាក់ ទៅយកប្រពន្ធចេញពីធ្វើការនៅផ្សារទំនើបAEON-3 តែមិនទាន់ដល់ផង ត្រូវរថយន្តមួយបាំងកន្លះពណ៌ស(មិនចាំស្លាកលេខ) បើកលឿនពេកបុកពីក្រោយម៉ូតូរបស់ជនរងគ្រោះប៉ើងខ្ទាតបោកលើថ្នល់ និងអូសទាំងមនុស្សនិងម៉ូតូឡេីងចិញ្ចើមផ្លូវ បណ្ដាលឱ្យរបួសកូនស្រីធ្ងន់ធ្ងរ ក្រោយមកបានបាត់បង់ជីវិតពេលបញ្ជូនទៅមន្ទីរពេទ្យ ។
សមត្ថកិច្ចបន្តថា ចំណែកឪពុករងរបួសធ្ងន់ និងកូនប្រុសតូចរបួសមធ្យម ឯរថយន្តមិនបានបន្ថយល្បឿន ថែមទាំងកិនអូសម៉ូតូទៅកល់ជាប់ពំនូកខ្សាច់ខ្ទេចខ្ទីស្ទេីរទាំងស្រុង ហើយបន្ថែមល្បឿនបើករត់បាត់តែម្តង។
ហេតុការណ៍ខាងលើនេះ កើតឡើងតាមបណ្ដោយមហាវិថីសម្ដេចតេជោហ៊ុនសែន ហៅផ្លូវ៦០ម៉ែត្រ ត្រង់ចំណុចមុខបង្គោលគីឡូម៉ែត្រលេខ៧ ក្នុងសង្កាត់ជើងឯក ខណ្ឌដង្កោ កាលពីនៅវេលាម៉ោងប្រមាណ០៩និង៣៥នាទីយប់ ថ្ងៃទី១១ ខែកុម្ភៈ ឆ្នាំ២០២៤ ដែលជាថ្ងៃចូលឆ្នាំចិនថ្ងៃទី២ ។ នៅទល់មុខចំណុចកើតហេតុឃើញមានកាមេរ៉ាសុវត្ថិភាពបំពាក់លើបង្គោលភ្លើង ដែលអាចថតសកម្មភាពនិងស្លាកលេខរថយន្តពណ៌សនោះបានយ៉ាងច្បាស់ ។
ក្រោយពេលកើតហេតុ ជនរងគ្រោះទាំងបីនាក់ត្រូវបានប្រជាពលរដ្ឋហៅកង់បីដឹកទៅពេទ្យ ព្រោះខ្លាចគ្រោះថ្នាក់ដល់អាយុជីវិត ។ ចំណែកក្មេងស្រីរងគ្រោះបានបញ្ជូនទៅសង្គ្រោះបន្ទាន់នៅឯមន្ទីរពេទ្យគន្ធបុប្ផាដែរ តែក្រុមគ្រូពេទ្យក៏បានព្យាយាមសង្គ្រោះតាមលទ្ធភាពដែរ តែអកុសលដោយស្ថានភាពរបួសធ្ងន់ធ្ងរពេកបានផុតដង្ហើម មិនអាចជួយសង្គ្រោះជីវិតបាន ។
សមត្ថកិច្ចបន្តថា បុរសជាឪពុកឈ្មោះ សោម សីហាក់ អាយុ៣៥ឆ្នាំ រងរបួសធ្ងន់ ជាអ្នកបេីកម៉ូតូCUP-50 ស៊េរីចាស់ ពណ៌ទឹកប៊ិចចាស់ ពាក់ស្លាកលេខ ភ្នំពេញ 1AV-8317 ដឹកកូនប្រុសម្នាក់ជិះខាងមុខឈ្មោះ សោម សុវណ្ណបញ្ញាអាយុ៤ឆ្នាំ រងរបួសបែកក្បាល និងពកក្បាលពីក្រោយ ,ចំណែកកូនស្រីម្នាក់ទៀតជិះឱបចង្កេះពីក្រោយឈ្មោះ សោមបញ្ញាលីកា អាយុ១១ឆ្នាំ បានបាត់បង់ជីវិតពេលបញ្ជូនទៅសង្គ្រោះនៅឯមន្ទីរពេទ្យ ។
ចំណែកម៉ូតូរបស់ជនរងគ្រោះត្រូវបានសមត្ថកិច្ចប៉ុស្តិ៍នគរបាលសង្កាត់ជេីងឯក ចុះទៅយកទៅរក្សាទុកបណ្ដោះអាសន្នរង់ចាំផ្នែកជំនាញចរាចរណ៍ខណ្ឌដង្កោ ធ្វើការតាមជំនាញបន្តទៀត ។ សពបានតម្កល់ធ្វើបុណ្យតាមប្រពៃណី នៅផ្ទះរបស់ក្រុមគ្រួសារជនរងគ្រោះ ស្ថិតនៅភូមិក្រពើហា សង្កាត់ព្រែកឫស្សី ក្រុងតាខ្មៅ ខេត្តកណ្តាល ។
សមត្ថកិច្ចបន្តថា អនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅនៅវេលាម៉ោង០៩និង៥នាទី ព្រឹកថ្ងៃទី១៣ ខែកុម្ភៈ ឆ្នាំ២០២៤នេះ កម្លាំងនគរបាលខណ្ឌដង្កោ សហការជាមួយកម្លាំងការិយាល័យនគរបាលចរាចរណ៍ផ្លូវគោក បានស្រាវជ្រាវរកឃើញរថយន្តបង្ក ត្រូវបានជនបង្កបើកយកមកចតប្លុងចោលនៅមុខអាគារ បុរី អ & អេហ្វ (R&F) លើផ្លូវ៦០ម៉ែត្រ សង្កាត់ចាក់អង្រែលើ ខណ្ឌមានជ័យ។
បច្ចុប្បន្នរថយន្តបង្ក ត្រូវបានយកមករក្សាទុកនៅការិយាល័យនគរបាលចរាចរណ៍ផ្លូវគោក ចំណែកអ្នកបើកបរបង្កសមត្ថកិច្ចបានកំណត់មុខសញ្ញារួចហើយ ហើយអំពាវនាវឱ្យអ្នកបើកបរបង្កចូលខ្លួនមកស្នងការដ្ឋាននគរបាលរាជធានីភ្នំពេញ ដើម្បីអនុវត្តតាមនីតិវិធី៕(ដោយ គា សំណាង)
