ភ្នំពេញ ៖ កម្លាំងនគរបាលនាយកដ្ឋានព្រហ្មទណ្ឌក្រសួង បានបង្ហាញមុខជនសង្ស័យក្មេងៗ៧នាក់ នាព្រឹកថ្ងៃទី១៤កុម្ភៈឆ្នាំ២០២៤នេះ ក្រោយពីបានធ្វើសកម្មភាពប្រេីកាំបិតកាប់ទៅលេីបុរសជនជាតិកូរ៉េ ឱ្យរងរបួសត្រង់ចំណុចថ្ពាល់ខាងឆ្វេង ដេីម្បីប្លន់យកទ្រព្យសម្បត្តិ កាលពីកាលថ្ងៃទី១០ ខែកុម្ភៈ ឆ្នាំ២០២៤ វេលាម៉ោង០៤កន្លងទៅ។
សមត្ថកិច្ចនិយាយថា លុះដល់ថ្ងៃទី១២ ខែកុម្ភៈ ឆ្នាំ២០២៤ វេលាម៉ោង៣និង៣០នាទីរសៀល កម្លាំងរបស់នាយកដ្ឋាននគរបាលព្រហ្មទណ្ឌ ដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន និងលោកវរសេនីយ៍ឯក ហែម បូណាអនុប្រធាននាយកដ្ឋាន បានដឹកនាំសហការជាមួយអធិការដ្ឋាននគរបាលខណ្ឌសែនសុខ បានឃាត់ខ្លួនជនសង្ស័យ៧នាក់ ជាបន្តបន្ទាប់។
សមត្ថកិច្ចបន្តថា ជនសង្ស័យ៧នាក់រួមមាន ១-ឈ្មោះ ពេញ សុភណ្ឌ ភេទប្រុស អាយុ១៦ឆ្នាំ, ២-ឈ្មោះ ណុប ដាវីត ភេទប្រុស អាយុ១៥ឆ្នាំ,៣-ឈ្មោះ ផល សម្ភស់ ភេទប្រុស អាយុ១៥ឆ្នាំ ,៤-ឈ្មោះ សុខ ធាសុភា ភេទប្រុស អាយុ១៥ឆ្នាំ ,៥-ឈ្មោះ ហាក់ ម៉េងឈី ភេទប្រុស អាយុ១៦ឆ្នាំ ,៦-ឈ្មោះ សម្បត្តិ សន្យា ភេទប្រុស អាយុ១៥ឆ្នាំ និង៧-ឈ្មោះ អាន ដេវីត ភេទប្រុស អាយុ១៦ឆ្នាំ នៅត្រង់ចំណុច ផ្លូវបេតុង ភូមិឃ្មួញ សង្កាត់ឃ្មួញ ខណ្ឌសែនសុខរាជធានីភ្នំពេញ។
ក្រោយពីការសាកសួរជនសង្ស័យទាំង៧នាក់ សុទ្ធតែមានការពាក់ព័ន្ធនឹងអំពេីកាប់ប្លន់ក្នុងរាជធានីភ្នំពេញកន្លងមក។ដោយឡែកក្នុងចំណោមជនសង្ស័យទាំង៧នាក់ មានជនសង្ស័យម្នាក់ គឺបានចូលរួមប្រព្រឹត្តបទល្មេីសកាប់ប្លនទៅលេីជនជាតិកូរ៉េ កាលពីថ្ងៃទី១០ ខែកុម្ភ: ឆ្នាំ២០២៤ រួមទាំងបក្ខពួកផ្សេងទៀត។
បច្ចុប្បន្នកម្លាំងនគរបាលព្រហ្មទណ្ឌបានប្រគល់ឱ្យទៅអធិការដ្ឋាននគរបាលខណ្ឌសែនសុខ ដើម្បីចាត់ការតាមនីតិវិធីបន្ត៕(ដោយ គា សំណាង)
