ភ្នំពេញ ៖ យុវជនម្នាក់បាត់បង់ជីវិត និងម្នាក់ទៀតរងរបួសធ្ងន់ ក្នុងហេតុគ្រោះថ្នាក់ចរាចរ ម៉ូតូនិងម៉ូតូ កាលពីវេលាម៉ោង ៦បិង៣០នាទីព្រលប់ ថ្ងៃទី ១៦ខែកុម្ភៈ ឆ្នាំ២០២៤ លើផ្លូវបេតុងព្រៃស ក្នុងសង្កាត់ព្រៃស ខណ្ឌដង្កោ រាជធានីភ្នំពេញ។
សពជនរងគ្រោះមានឈ្មោះ ស្មាន់ វិច្ឆិកា អាយុ ២២ឆ្នាំ មុខរបរលាងរថយន្ត មានស្រុកកំណើតនៅ ស្រុកព្រៃកប្បាស ខេត្តតាកែវ ( ជាអ្នកអង្គុយខាងក្រោយ ) ជិះម៉ូតូម៉ាក ហុងដាស្គុបពី ពណ៌ស ពាក់ផ្លាកលេខភ្នំពេញ 1IS-9016 ដែលមានយុវជនជាមិត្តភក្តិឌុប (រងរបួសធ្ងន់ ) ។
សាក្សីបានឲ្យដឹងថា មុនពេលកើតហេតុ គេឃើញយុវជនរងគ្រោះទាំង២នាក់ ជិះម៉ូតូឌុបគ្នាចេញពីកន្លែងលាងរថយន្ត ដោយធ្វើដំណើរទិសដៅ ពីត្បូងមកជើងក្នុងល្បឿនលឿន បានវ៉ាជែងខាងឆ្វេងជ្រុលទៅបុកម៉ូតូគេពីក្រោយ ដែលនៅខាងមុខ បណ្ដាលឱ្យបោកដួលខ្លួនឯង រួចម៉ូតូមកពីទិសផ្ទុយ បានកិនចំក្បាលបន្ថែមទៀត ទើបណ្ដាលឱ្យស្លាប់ម្នាក់ របួសធ្ងន់ម្នាក់ ។ បន្ទាប់ពីឃើញហេតុការបែបនេះ ម៉ូតូដែលត្រូវជនរងគ្រោះបុកពីក្រោយនិងម៉ូតូដែលកិននោះ បានលើកម៉ូតូជិះចាកចេញបាត់អស់ ។
បន្ទាប់ពីកើតហេតុ សមត្ថកិច្ចវាស់វែង យកម៉ូតូជនរងគ្រោះទៅរក្សាទុកនៅប៉ូលិសខណ្ឌ ឯសពត្រូវក្រុមគ្រួសារ យកទៅធ្វើបុណ្យ នៅឯស្រុកកំណើត ៕ BBN07
