បរទេស ៖ លោក វ៉ូឡូឌីមៀ ហ្សេលេនស្គី បាននិយាយថា «ទាហានអ៊ុយក្រែន ៣១.០០០ នាក់ត្រូវបានបាត់បង់ជីវិតក្នុងអំឡុងការឈ្លានពានពេញទំហឹងរបស់រុស្ស៊ី»។
ប្រធានាធិបតីអ៊ុយក្រែនបាននិយាយថា «លោកនឹងមិនផ្តល់ចំនួនអ្នករបួសទេ ព្រោះវានឹងជួយដល់ការរៀបផែនការយោធារបស់រុស្ស៊ី»។
ជាធម្មតា មន្ត្រីអ៊ុយក្រែនមិនបង្ហាញតួលេខជនរងគ្រោះជាសាធារណៈទេ ហើយការប៉ាន់ស្មានផ្សេងទៀតគឺមានខ្ពស់ជាងច្រើនណាស់។
រឿងនេះកើតឡើងបន្ទាប់ពីរដ្ឋមន្ត្រីការពារជាតិបាននិយាយថា ពាក់កណ្តាលនៃជំនួយរបស់លោកខាងលិចទាំងអស់សម្រាប់អ៊ុយក្រែនត្រូវបានពន្យារពេល ជាហេតុនាំឱ្យបាត់បង់ជីវិត និងទឹកដីជាច្រើន។
លោកហ្សេលេនស្គីបាននិយាយកាលពីថ្ងៃអាទិត្យថា «លោកផ្តល់ចំនួនអ្នកស្លាប់ថ្មីៗនេះ គឺដើម្បីឆ្លើយតបទៅនឹងតួលេខបំប៉ោង ដែលរុស្ស៊ីបានដកស្រង់។ ទាហានអ៊ុយក្រែន ៣១.០០០ នាក់បានបាត់បង់ជីវិតនៅក្នុងសង្រ្គាមនេះ។មិនមែន ៣០០.០០០ ឬ ១៥០.០០០ នាក់ ឬអ្វីក៏ដោយដែលលោកពូទីន និងក្រុមកុហករបស់គាត់កំពុងនិយាយនោះទេ។ប៉ុន្តែរាល់ការបាត់បង់នីមួយៗគឺជាការបាត់បង់ដ៏ធំធេងសម្រាប់ពួកយើង»។
និយាយអំពីការបាត់បង់កាន់តែទូលំទូលាយជាងនេះនៅក្នុងសង្រ្គាម លោកហ្សេលេនស្គីបាននិយាយថា ជនស៊ីវិលរាប់ម៉ឺននាក់បានបាត់បង់ជីវិត នៅក្នុងតំបន់នៃអ៊ុយក្រែនដែលកាន់កាប់ដោយរុស្ស៊ី ប៉ុន្តែចំនួនពិតនៅមិនទាន់ដឹងនៅឡើយ។«ខ្ញុំមិនដឹងថាមានប៉ុន្មាននាក់ស្លាប់ ប៉ុន្មាននាក់ត្រូវគេសម្លាប់ ប៉ុន្មាននាក់ត្រូវគេធ្វើទារុណកម្ម ប៉ុន្មាននាក់ត្រូវគេនិរទេសនោះទេ»។
វាកម្រណាស់សម្រាប់អ៊ុយក្រែនក្នុងការផ្តល់ចំនួនអ្នកស្លាប់ខាងយោធា ហើយការប៉ាន់ប្រមាណផ្សេងទៀតបានបង្ហាញថាមានចំនួនខ្ពស់ជាងនេះ។
ចំណែកមន្ត្រីអាមេរិកកាលពីខែសីហាបានដាក់ចំនួនទាហានអ៊ុយក្រែនដែលបានបាត់បង់ជីវិត រហូតដល់ទៅ ៧០.០០០នាក់ និងរបួសដល់ទៅ ១២ ម៉ឺននាក់៕(ប្រែសម្រួលដោយ លោកសំណាង)
