បរទេស ៖ ការសិក្សាមួយបានរកឃើញថា ការដុះក្បាលពោះដោយសារស្រាបៀរអាចធ្វើឱ្យខួរក្បាលឆាប់ចាស់ និងធ្វើឱ្យថយចុះការយល់ដឹងចំពោះបុរសវ័យកណ្តាល ។ នេះបើយោងតាមកាសែតដេល្លីម៉ែលចុះផ្សាយកាលពីថ្ងៃទី២៧ខែកុម្ភៈ ឆ្នាំ២០២៤។
អ្នក ដែលមានខ្លាញ់ក្បាលពោះច្រើន និងមានប្រវត្តិគ្រួសារកើតជំងឺ Alzheimer ត្រូវបានគេរកឃើញថា«មានមុខងារខួរក្បាលទាប»។ អ្នកស្រាវជ្រាវជឿថា ខ្លាញ់ខ្ពស់នៅក្នុងលំពែង និងថ្លើមអាចនាំឱ្យមានហានិភ័យខ្ពស់នៃជំងឺវង្វេង។ទោះយ៉ាងណាក៏ដោយ នេះមិនមែនជាករណីសម្រាប់ស្ត្រីនោះទេ។
លោកស្រី Michal Schnaider Beeri មកពី Rutgers Health រដ្ឋ New Jersey បាននិយាយថា «ចំពោះបុរសវ័យកណ្តាលដែលមានហានិភ័យខ្ពស់នៃជំងឺ Alzheimer, ប៉ុន្តែមិនមែនស្ត្រី ខ្លាញ់លំពែងខ្ពស់ត្រូវបានផ្សាភ្ជាប់ជាមួយនឹងការថយចុះនៃការយល់ដឹង និងបរិមាណខួរក្បាល ដែលនេះចង្អុលបង្ហាញពីទំនាក់ទំនងភេទជាក់លាក់រវាងខ្លាញ់ក្បាលពោះខុសធម្មតាជាមួយនឹងសុខភាពខួរក្បាល»។
អ្នកស្រាវជ្រាវបានសិក្សាទៅលើមនុស្សវ័យកណ្តាលដែលមានសុខភាពល្អចំនួន ២០៤ នាក់ដែលមានប្រវត្តិគ្រួសារកើតជំងឺភ្លេចភ្លាំង។ ពួកគេបានរកឃើញថា បុរសដែលមានខ្លាញ់ក្បាលពោះខ្ពស់ មានមុខងារយល់ដឹងទាប។
ការសិក្សាពីមុនបានបង្ហាញថា បុរសដែលមាន BMI ខ្ពស់ មានហានិភ័យខ្ពស់នៃជំងឺវង្វេង។ ប៉ុន្តែការស្រាវជ្រាវថ្មីនេះបង្ហាញថា បញ្ហាគឺជាប់ទាក់ទងជាពិសេសទៅនឹងការរាលដាលក្នុងចំណោមបុរសវ័យកណ្តាល។
លោកស្រី Sapir Golan Shekhtman មកពីមជ្ឈមណ្ឌលវេជ្ជសាស្ត្រ Sheba ក្នុងប្រទេសអ៊ីស្រាអែលបានបន្ថែមថា «ការរកឃើញរបស់យើងបង្ហាញពីទំនាក់ទំនងខ្លាំងជាងបើប្រៀបធៀបទៅនឹងទំនាក់ទំនងរវាង BMI និងការយល់ដឹង ដែលនេះបង្ហាញថា ការកកើតខ្លាញ់ក្បាលពោះជាជាង BMI គឺជាកត្តាហានិភ័យសម្រាប់មុខងារនៃការយល់ដឹងទាប និងហានិភ័យនៃជំងឺវង្វេងខ្ពស់»។ ការសិក្សានេះត្រូវបានចុះផ្សាយក្នុងទស្សនាវដ្ដី Obesity ៕
