បរទេស ៖ ប្រធានាធិបតីហ្វីលីពីនលោក Ferdinand Marcos បានប្រាប់សភាអូស្ត្រាលីថា ប្រទេសរបស់លោកកំពុងស្ថិតនៅ «ជួរមុខ»នៃសមរភូមិដើម្បីសន្តិភាពក្នុងតំបន់កាលពីថ្ងៃព្រហស្បតិ៍ ថ្ងៃទី ២៩ ខែកុម្ភៈឆ្នាំ២០២៤ ដោយសន្យាតាំងចិត្តមោះមុត ខណៈដែលលោកស្វែងរកការគាំទ្រក្នុងជម្លោះដែនសមុទ្រជាមួយចិន។
ជាមួយនឹងនាវាចម្បាំងរបស់រដ្ឋាភិបាលក្រុងប៉េកាំងត្រូវបានរកឃើញនៅក្នុងដែនទឹកក្បែរឆ្នេរសមុទ្រនៃប្រទេសរបស់គាត់ លោក Marcos បានប្រាប់សមាជិកសភាអូស្ត្រាលីថា «ឥឡូវនេះហ្វីលីពីនបានរកឃើញខ្លួនឯងស្ថិតនៅសមរភូមិជួរមុខប្រឆាំងនឹងសកម្មភាពដែលបំផ្លាញសន្តិភាពក្នុងតំបន់ បំផ្លាញស្ថិរភាពក្នុងតំបន់ និងគំរាមកំហែងដល់ភាពជោគជ័យក្នុងតំបន់»។ លោកបានប្តេជ្ញាថា«នឹងរក្សាភាពរឹងមាំក្នុងការការពារអធិបតេយ្យភាពរបស់ប្រទេសលោក»។
លោក Marcos បាននិយាយទៅកាន់អ្នកទះដៃអបអរសាទរខ្លាំងៗ ថា «ខ្ញុំនឹងមិនអនុញ្ញាតឱ្យមានការប៉ុនប៉ងដោយមហាអំណាចបរទេសណាមួយដើម្បីយកទឹកដីអធិបតេយ្យភាពរបស់យើងសូម្បីមួយមិល្លីម៉ែត្រ។ បញ្ហាប្រឈមដែលយើងប្រឈមមុខអាចជារឿងគួរឱ្យខ្លាច ប៉ុន្តែអ្វីដែលគេខ្លាចដែរនោះគឺការតាំងចិត្តរបស់យើង។ យើងនឹងមិនចុះចាញ់ឡើយ»។
អាជ្ញាធរហ្វីលីពីនក្នុងសប្តាហ៍នេះបាននិយាយថា ពួកគេបានរកឃើញនាវាកងទ័ពជើងទឹកចិននៅជុំវិញតំបន់ថ្មប៉ប្រះទឹកScarborough Shoal ជាតំបន់ដែលត្រូវបានកាន់កាប់ដោយទីក្រុងប៉េកាំងក្នុងឆ្នាំ ២០១២។
ចិនបានអះអាងថា តំបន់ថ្មប៉ប្រះទឹកនេះ និងតំបន់សមុទ្រចិនខាងត្បូងស្ទើរទាំងស្រុងជាកម្មសិទ្ធិរបស់ខ្លួន ដោយមិនអើពើនឹងការជំទាស់ក្នុងតំបន់ និងសេចក្តីសម្រេចរបស់តុលាការអន្តរជាតិ ដែលថាការអះអាងនេះមិនមានមូលដ្ឋានច្បាប់៕(ប្រែសម្រួលដោយ លោកសំណាង)