កំពង់ស្ពឺ ៖ មានករណីរថយន្តដាច់ហ្រ្វាំងធ្លាក់ចំណោត នៅម្តុំយាយម៉ៅពេជ្រនិល បណ្តាលឱ្យមនុស្សរបួសធ្ងន់ ស្រាល៤នាក់ កើតឡើងកាលពីវេលាម៉ោង១០និង៣៩នាទីយប់ថ្ងៃទី២៨ កុម្ភៈ ឆ្នាំ២០២៤ មានករណីគ្រោះថ្នាក់ចារាចរណ៍មួយកើតឡើងនៅលើផ្លូវជាតិលេខ៤ ចន្លោះគីឡូម៉ែត្រ១០៦-១០៧ ភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ ។
សមត្ថកិច្ចនិយាយថា រថយន្តដែលដាច់ហ្រ្វាំងរេចង្កូតប៉ះរថយន្ត ដែលបើកបរក្នុងទិសដៅបញ្រ្ចាសគ្នា គឺរថយន្តម៉ាកHYUNDAI ពណ៌ក្រហម ពាក់ស្លាកលេខ ភ្នំពេញ3F-7734 បើកបរដោយឈ្មោះ យា រត្ននា ភេទប្រុស អាយុ៤៤ឆ្នាំរស់នៅភូមិប្រមរ ឃុំព្រៃពួច ស្រុកអង្គស្នួល ខេត្តកណ្ដាល ដោយមានអ្នករួមដំណើរ០៣នាក់ ។
បើតាមសាក្សីបានបញ្ជាក់ថា រថយន្ដខាងលើបានបេីកមកដល់ចំណុចខាងលើ ក៏ដាច់ហ្រ្វាំងរេចង្កូតទៅប៉ះរថយន្ត០១គ្រឿង ម៉ាក HYUNDAI ពណ៌ខៀវ ពាក់ស្លាកលេខភ្នំពេញ3F-0268 សណ្ដោងស៊ឺមីរ៉ឺម៉ក ពាក់ស្លាកលេខព្រះសីហនុ4A-1156 អ្នកបើកបរមិនស្គាល់អត្តសញ្ញាណ (បានចុះរត់គេចពីកន្លែងកើតហេតុ) ដែលកំពុងបើកបរ បញ្រ្ចាសទិសគ្នា បណ្តាលឱ្យគ្រោះថ្នាក់មនុស្សនិងខូចខាតសម្ភារ។
សមត្ថកិច្ចបន្តថា មនុស្ស០៤នាក់ដែលរងរបួសធ្ងន់ស្រាលរួមមាន ១-ឈ្មោះ តា រត្ននា,ឈ្មោះទូច ពិសី,ឈ្មោះស្រួចកក្កដា និង ឈ្មោះឡៃ ស៊ីវម៉េង ត្រូវបានរថយន្តសង្គ្រោះបញ្ជាការដ្ឋានការពារកោះឆ្នេរបញ្ជូនយកទៅសង្គ្រោះនៅមន្ទីរពេទ្យបង្អែកខេត្តកំពង់ស្ពឺ។ ចំណែកខូចខាតរថយន្ត០២គ្រឿង ធ្ងន់ធ្ងរ ។
ករណីគ្រោះថ្នាក់ខាងលើនេះ សមត្ថកិច្ចនគរបាល បានចុះពិនិត្យទីតាំងកេីតហេតុ និងចំណាត់ការតាមនីតិវិធីរួចរាល់ហើយ ៕(ដោយ គា សំណាង)
