បរទេស ៖ ប្រធានាធិបតីអាមេរិកលោក ចូ បៃដិន បានប្រកាសនៅថ្ងៃសុក្រ ទី ១ ខែមីនា ឆ្នាំ២០២៤ នូវផែនការសម្រាប់ការទម្លាក់អាហារ និងការផ្គត់ផ្គង់ទៅកាន់តំបន់ហ្គាហ្សា ពោលគឺមួយថ្ងៃបន្ទាប់ពីការស្លាប់របស់ជនជាតិប៉ាឡេស្ទីនដែលឈរតម្រង់ជួរស្វែងរកជំនួយ បានធ្វើឱ្យមានការចាប់អារម្មណ៍លើគ្រោះមហន្តរាយមនុស្សធម៌ដែលកំពុងកើតឡើងនៅក្នុងតំបន់ឆ្នេរហ៊ុមព័ទ្ធជិតនេះ។
លោកបៃដិនបាននិយាយថា ការទម្លាក់អាហារតាមយន្តហោះនឹងធ្វើឡើងនៅប៉ុន្មានថ្ងៃខាងមុខនេះ ប៉ុន្តែមិនបានផ្តល់ព័ត៌មានជាក់លាក់បន្ថែមទៀតទេ។ ប្រទេសផ្សេងទៀត រួមទាំងហ្សកដានី និងបារាំង បានអនុវត្តការទម្លាក់ជំនួយទៅកាន់តំបន់ហ្គាហ្សារួចហើយ។
យោងតាមការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិបានឱ្យដឹងថា«យ៉ាងហោចណាស់មនុស្ស ៥៧៦.០០០ នាក់នៅក្នុងតំបន់ហ្គាហ្សាស្ទ្រីប ពោលគឺមួយភាគបួននៃចំនួនប្រជាជនសរុប គឺសល់មួយជំហាននឹងជួបទុរ្ភិក្ស»។
អាជ្ញាធរសុខាភិបាលហ្គាហ្សាបាននិយាយថា កងកម្លាំងអ៊ីស្រាអែលបានសម្លាប់មនុស្សជាង ១០០ នាក់ដែលព្យាយាមចូលទៅរកក្បួនរថយន្តផ្តល់ជំនួយនៅជិតទីក្រុងហ្គាហ្សាកាលពីព្រឹកថ្ងៃព្រហស្បតិ៍ ខណៈដែលប៉ាឡេស្ទីនប្រឈមមុខនឹងស្ថានការណ៍កាន់តែអស់សង្ឃឹមនៅក្នុងសង្គ្រាមជិតប្រាំខែ ដែលបានចាប់ផ្តើមដោយការវាយប្រហាររបស់ពួកហាម៉ាសលើអ៊ីស្រាអែលកាលពីថ្ងៃទី ៧ ខែតុលាឆ្នាំ២០២៣។
អ៊ីស្រាអែលបានស្តីបន្ទោសការស្លាប់ភាគច្រើនទៅលើហ្វូងមនុស្សដែលបានចោមរោមមើលរថយន្តជំនួយ ដោយនិយាយថាជនរងគ្រោះត្រូវបានជាន់ ឬរត់ពីលើ។ មន្ត្រីអ៊ីស្រាអែលម្នាក់ក៏បាននិយាយដែរថា «ក្នុងការឆ្លើយតបមានកម្រិត» កងទ័ពក្រោយមកបានបាញ់ទៅលើហ្វូងមនុស្សដែលពួកគេគិតថាបង្កការគំរាមកំហែង។
ជាមួយនឹងមនុស្សជាច្រើនបរិភោគចំណីសត្វ និងសូម្បីដើមដំបងយក្សដើម្បីរស់ ហើយជាមួយនឹងក្រុមគ្រូពេទ្យនិយាយថា កុមារកំពុងស្លាប់នៅក្នុងមន្ទីរពេទ្យដោយសារកង្វះអាហារូបត្ថម្ភ និងកង្វះជាតិទឹក អង្គការសហប្រជាជាតិបាននិយាយថា ខ្លួនប្រឈមមុខនឹង “ឧបសគ្គដ៏ច្រើន” ក្នុងការទទួលបានជំនួយ។
លោក David Deptula ឧត្តមសេនីយ៍ផ្កាយបីកងទ័ពអាកាសអាមេរិកចូលនិវត្តន៍ ដែលធ្លាប់បានបញ្ជាតំបន់គ្មានការហោះហើរនៅភាគខាងជើងប្រទេសអ៊ីរ៉ាក់ បាននិយាយថា «ការទម្លាក់អាហារតាមយន្តហោះគឺជាអ្វីដែលយោធាអាមេរិកអាចអនុវត្តប្រកបដោយប្រសិទ្ធភាព»។
លោក Deptula បានប្រាប់ទីភ្នាក់ងារសារព័ត៌មានរ៉យទ័រថា «វាគឺជាច្រកផ្លូវបេសកកម្មដ៏ត្រឹមត្រូវរបស់ពួកគេ។ មានបញ្ហាប្រឈមលម្អិតជាច្រើន។ ប៉ុន្តែមិនមានអ្វីដែលមិនអាចទប់ទល់បាននោះឡើយ»៕(ប្រែសម្រួលដោយ លោកសំណាង)
