បាត់ដំបង ៖ រថយន្តឈ្នួលមួយគ្រឿង ខណៈកំពុងបើកបរតាមផ្លូវសុខៗ ស្រាប់តែឆ្លងភ្លើងឆេះឈុលអស់នៅសល់តែគ្រោងឆ្អឹង កើតឡើងកាលពីថ្ងៃ ពុធ ទី១៣ ខែមីនា ឆ្នាំ២០២៤ វេលាម៉ោង ១២ថ្ងៃត្រង់ នៅត្រង់ចំណុចផ្លូវវាងក្រុងជិតទីតាំងផ្សារគ្លូប៊ល ហៅស៍ ភូមិអង់ សង្កាត់ អូរចារ ក្រុងបាត់ដំបង ខេត្តបាត់ដំបង ។
សមត្ថកិច្ចនិយាយថា រថយន្តដែលឆេះម៉ាកស្តារិច ពណ៌ទឹកប្រាក់ ពាក់ស្លាកលេខ ភ្នំពេញ 2AZ-6970 ដែលជាអ្នកបើកបរ បានរត់ចោលរថយន្តបាត់ ។ សមត្ថកិច្ចបញ្ជាក់ថា រថយន្តឆេះបណ្តាលមកពីឆ្លងចរន្តអគ្គិសនីប្រព័ន្ធភ្លើងក្នុងរថយន្តបណ្តាលឱ្យឆាបឆេះតែម្តង។
កងកម្លាំងនគរបាលបង្ការពន្លត់អគ្គិភ័យ និងសង្គ្រោះ ពុំបានចេញរថយន្តពន្លត់អគ្គិភ័យជួយសង្គ្រោះទេដោយមានរថយន្តរបស់ស្ថានីយប្រេងឥន្ធនៈតេលាចេញជួយអន្តរាគមន៍ពន្លត់។ ទោះជាខំជួយពន្លត់យ៉ាងណាក៏ដោយរថយន្តបានឆេះអស់សល់តែគ្រោងឆ្អឹង តែមិនបានឆេះរាលដាល់ដល់លំនៅដ្ឋានរបស់ពលរដ្ឋនោះឡើយ៕(ដោយ ៖ គាសំណាង)