បរទេស ៖ តុលាការក្នុងស្រុកបាននិយាយកាលពីថ្ងៃសុក្រទី ១៥ មីនាថា តារាសម្តែងរឿង Squid Game របស់កូរ៉េខាងត្បូង លោក O Yeong-su ត្រូវបានរកឃើញថាមានពិរុទ្ធពីបទបៀតបៀនកេរភេទ បន្ទាប់ពីគាត់ត្រូវបានចោទប្រកាន់ពីបទបៀតបៀននារីម្នាក់កាលពីឆ្នាំ ២០១៧។
បុរសអាយុ ៧៩ ឆ្នាំក្នុងឆ្នាំ ២០២២ បានក្លាយជាជនជាតិកូរ៉េខាងត្បូងដំបូងគេដែលឈ្នះពានរង្វាន់ Golden Globe សម្រាប់តួសម្តែងរងល្អដាច់គេសម្រាប់ការសម្តែងរបស់គាត់ក្នុងនាមជាបុរសចំណាស់ងាយរងគ្រោះនៅក្នុងខ្សែភាពយន្តបែបរន្ធត់របស់ Netflix ។
តារាសម្តែងរូបនេះត្រូវបានកាត់ទោសឱ្យជាប់ពន្ធនាគាររយៈពេល ៨ ខែដោយព្យួររយៈពេល ២ ឆ្នាំ ។ នេះបើយោងតាមតុលាការក្រុង Suwon ។តុលាការបានបន្ថែមថា គាត់ក៏ត្រូវបានបញ្ជាឱ្យបញ្ចប់ថ្នាក់រៀនចំនួន ៤០ ម៉ោង ស្តីពីអំពើហិង្សាផ្លូវភេទផងដែរ។
ចៅក្រម Jeong Yeon-ju បាននិយាយថា កំណត់ត្រាផ្ទាល់ខ្លួនរបស់ជនរងគ្រោះនៃការបំពាន និងការអះអាងរបស់នាងគឺ «ជាប់លាប់ … និងហាក់ដូចជាសេចក្តីថ្លែងការណ៍មិនអាចត្រូវបានធ្វើឡើងដោយគ្មានបទពិសោធន៍ជួបរឿងពិតនោះឡើយ»។
ខណៈលោកកំពុងចាកចេញពីតុលាការ លោក O Yeong-su បានប្រាប់អ្នកសារព័ត៌មានថា «លោកគ្រោងនឹងប្តឹងឧទ្ធរណ៍ប្រឆាំងនឹងការសម្រេចនេះ។ គាត់មានពេលប្រាំពីរថ្ងៃដើម្បីប្តឹងឧទ្ធរណ៍ បើមិនចឹងទេសាលក្រមនឹងត្រូវតម្កល់ទុក»៕(ប្រែសម្រួលដោយ លោកសំណាង)
