បរទេស ៖ ក្រសួងការបរទេស (MFA) និង ក្រសួងការពារជាតិ (MINDEF)សិង្ហបុរី បាននិយាយកាលពីថ្ងៃអាទិត្យទី១៧ មីនាឆ្នាំ២០២៤ថា «ជំនួយមនុស្សធម៌ទីបីរបស់សិង្ហបុរីសម្រាប់តំបន់ហ្គាហ្សា ដែលមានកញ្ចប់អាហារ និងការផ្គត់ផ្គង់សំខាន់ៗ បានមកដល់ប្រទេសហ្សកដានីហើយ»។
កងទ័ពអាកាសនៃសាធារណរដ្ឋសិង្ហបុរី (RSAF) នឹងចាប់ផ្តើមប្រតិបត្តិការទម្លាក់ជំនួយតាមយន្តហោះចេញពីប្រទេសហ្សកដានីក្នុងពេលឆាប់ៗនេះ រួមជាមួយនឹងកងទ័ពអាកាសហ្សកដានីដើម្បីផ្តល់ជំនួយដល់ក្រុមមនុស្ស ដែលកំពុងស្រេកឃ្លាន។
ក្រសួងទាំងពីរបាននិយាយថា កញ្ចប់ជំនួយមនុស្សធម៌ ដែលរួមមានការផ្គត់ផ្គង់ និងឧបករណ៍វេជ្ជសាស្ត្រ ត្រូវបានដាក់បញ្ចូលគ្នាដោយរដ្ឋាភិបាលសិង្ហបុរី ក្នុងការពិគ្រោះយោបល់យ៉ាងជិតស្និទ្ធជាមួយហ្សកដានី និង «ផ្អែកលើតម្រូវការជាក់ស្តែងនៅតំបន់ហ្គាហ្សា»។
MFA និង MINDEF បាននិយាយថា «សិង្ហបុរីបន្តអំពាវនាវឱ្យមានបទឈប់បាញ់ដើម្បីមនុស្សធម៌ជាបន្ទាន់ ហើយជំរុញឱ្យភាគីទាំងអស់អនុញ្ញាតឱ្យមានការផ្តល់ជំនួយមនុស្សធម៌ភ្លាមៗ សុវត្ថិភាព និងគ្មានការរារាំងដល់ជនស៊ីវិលដែលរងផលប៉ះពាល់នៅតំបន់ហ្គាហ្សា»។
ពួកគេបានបន្ថែមថា សិង្ហបុរីនឹងបន្តធ្វើការយ៉ាងជិតស្និទ្ធជាមួយដៃគូរបស់ខ្លួននៅមជ្ឈិមបូព៌ា និងដៃគូមនុស្សធម៌ក្នុងតំបន់ដើម្បីផ្តល់ជំនួយ និងការគាំទ្របន្ថែមដល់សហគមន៍ដែលរងផលប៉ះពាល់។
សង្គ្រាមបានចាប់ផ្តើមនៅថ្ងៃទី ៧ ខែតុលា ឆ្នាំ២០២៤នៅពេលដែលក្រុមហាម៉ាស់បានបញ្ជូនក្រុមយុទ្ធជនចូលទៅក្នុងប្រទេសអ៊ីស្រាអែល ដោយសម្លាប់មនុស្សចំនួន ១.២០០ នាក់ ដែលភាគច្រើនជាជនស៊ីវិល និងចាប់បានចំណាប់ខ្មាំងចំនួន ២៥៣ នាក់។ នេះបើយោងតាមចំនួនសរុបរបស់អ៊ីស្រាអែល។
យុទ្ធនាការជើងគោក និងជើងអាកាសរបស់អ៊ីស្រាអែល បានសម្លាប់មនុស្សជាង ៣១.៥០០ នាក់ ។នេះបើយោងតាមក្រសួងសុខាភិបាលនៅទីក្រុងហាម៉ាស ដែលគ្រប់គ្រងហ្គាហ្សា។ អ៊ីស្រាអែលនិយាយថា ខ្លួនបានសម្លាប់សមាជិកក្រុមហាម៉ាស់យ៉ាងហោចណាស់ ១៣.០០០ នាក់នៅក្នុងការប្រយុទ្ធគ្នានៅតំបន់ហ្គាហ្សា៕(ប្រែសម្រួលដោយ លោកសំណាង)