កំពង់ស្ពឺ ៖ មានករណីគ្រោះថ្នាក់ចរាចរណ៍ នៅលើផ្លូវជាតិលេខ៤ ចន្លោះគីឡូម៉ែត្រលេខ៤៦-៤៧ ស្ថិតនៅភូមិសំណង់សង្កាត់រការធំ ក្រុងច្បារមន ខេត្តកំពង់ស្ពឺ ម៉ូតូបើកបុកសត្វគោលើផ្លូវ បណ្តាលឱ្យមនុស្ស២នាក់បាត់បង់ជីវិតនិងសត្វគោមួយក្បាលងាប់ កើតឡើងនាវេលាម៉ោង១២និង៤០នាទី រំលងអធ្រា្រតឈានចូលថ្ងៃទី១៧ ខែមីនាឆ្នាំ២០២៤។
សមត្ថកិច្ចនិយាយថា ភាគីម៉ូតូ០១គ្រឿងម៉ាកយ៉ាន់ម៉ាហាអុិច-អរ (XR) ពណ៌ខ្មៅពាក់ផ្លាកលេខ ភ្នំពេញ1XQ-5354បើកបរពីទិសខាងកើត ទៅទិសខាងលិច អ្នកបើកបរឈ្មោះ សឿង វើន ភេទប្រុស អាយុ២៧ឆ្នាំ អ្នករួមដំណើរឈ្មោះ ឡាំ បូរាណ ភេទប្រុស អាយុ២៥ឆ្នាំ រស់នៅភូមិព្រៃក្បុង ឃុំព្រៃក្មេង ស្រុកភ្នំស្រួច ខេត្តកំពង់ស្ពឺ បើកម៉ូតូដល់ចំណុចខាងលើ បានបុកសត្វគោញីមួយក្បាលដេីរឆ្លងផ្លូវ បណ្តាលឲ្យគ្រោះថ្នាក់ស្លាប់មនុស្ស០២នាក់នៅហ្នឹងកន្លែង ,ឯសត្វគោក៏ងាប់នៅកន្លែងកេីតហេតុ ដូចគ្នា ។
តាមព័ត៌មានពីមន្រ្ដីនគរបាលមូលដ្ឋាន ថា បច្ចុប្បន្នពលរដ្ឋជាម្ចាស់សត្វចិញ្ចឹមនៅតែបន្ដលែងសត្វមិនទទួលខុសត្រូវនិងតែងតែបង្កបញ្ហាគ្រោះថ្នាក់ផ្សេងៗញឹកញាប់ពេលខ្លះខូចខាតសម្ភារៈ ទោះបីជាអាជ្ញាធរមូលដ្ឋានបានផ្សព្វផ្សាយអំពីបញ្ហានេះក៏នៅតែបន្ដកេីតមាន។ ជាក់ស្តែងថៃ្ងនេះបណ្ដាលឲ្យមានការបាត់បង់អាយុជីវិតមនុស្ស២នាក់ សមត្ថកិច្ចបានស្រាវជ្រាវកំណត់ម្ចាស់សត្វចិញ្ចឹម ដេីម្បីទទួលខុសត្រូវចំពោះផ្លូវច្បាប់។
សមត្ថកិច្ចបានសំណូមពរ ដល់ពលរដ្ឋដែលជាម្ចាស់សត្វចិញ្ចឹមនានាដែលកំពុងតែមានការចិញ្ចឹមសូមមេត្ដាយកចិត្ដទុកដាក់និងអនុវត្តតាមការណែនាំនិងគោរពច្បាប់ ៕