កណ្តាល ៖ ភ្លើងបានឆេះរោងចក្រស្បែកជើងអ.ជី ហ៊្វូតវែរ(ខេមបូដា)ឯ.ក( R.G FOOTWEAR(CAMBODIA)Co ,LTD ) ស្ថិតនៅភូមិស្វាយជ្រំ ឃុំបែកចាន ស្រុក អង្គស្នួល ខេត្តកណ្ដាល (ខាងក្រោយរោងចក្រស៊ីភី) ប្រមាណវេលាម៉ោង៤និង៤៥ ល្ងាចថ្ងៃទី១៨មីនា រហូតដល់ម៉ោងប្រមាណ១និង៣៥នាទីរំលងអធ្រាត្រ ថ្ងៃទី១៨ ខែមីនា ឆ្នាំ២០២៤ ទើបរលត់ទាំងស្រុង។
យោងតាមប្រសាសន៍របស់ ឯកឧត្ដម ឧត្ដមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្គ្រោះបានឱ្យដឹងថា«ដោយមានការសហការគ្នាល្អពីបណ្តាអង្គភាពជំនាញផ្សេងៗ ការប្រើប្រាស់រថយន្តពន្លត់អគ្គិភ័យសរុបចំនួន៥០គ្រឿង ចំពោះស្ថានភាពអគ្គ័យយើងគ្រប់គ្រងបាន១០០ភាគរយហើយ» (គិតមកដល់ព្រឹកនេះ)។
ឯកឧត្តមបន្តថា មកដល់ពេលនេះ លោកពុំទាន់បានទទួលព័ត៌មានថា មានកម្មករ កម្មការិនី រងគ្រោះថ្នាក់នៅឡើយ។យ៉ាងណាក៏ដោយលោកបន្តស្រាវជ្រាវបន្ថែម ។ ចំពោះមូលហេតុក៏កំពុងស្រាវជ្រាវ ។
ចំណែកលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល នៅបន្តបញ្ជាដឹកនាំផ្ទាល់នៅទីកន្លែងបានឱ្យដឹងថា «គិតត្រឹម១២និង៣០នាទីរំលង អធ្រាត្រ អគ្គិភ័យឆេះរោងចក្រស្បែកជើងនៅស្រុកអង្គស្នួល មិនទាន់រលត់ទាំងស្រុងនៅឡើយ។ លោកបន្តដឹកនាំដើម្បីពន្លត់បន្តឱ្យរលត់ទាំងស្រុង»។
ខាងសន្តិសុខរោងចក្រ និង អាជ្ញាធរមូលដ្ឋាន បាននាំគ្នាវាយទម្លុះជញ្ជាំងរោងចក្រ ដើម្បីរំដោះកម្មករ កម្មការិនី ចេញពីរោងចក្រដើម្បីចៀសវាងមានគ្រោះថ្នាក់ជាយថាហេតុ ។
យោងតាមរបាយការណ៍ដោយឡែក របស់កងប្រតិបត្តិការរុករកនិងសង្រ្គោះគ្រោះមហន្តរាយ៧១១ កងពលតូចលេខ៧០បានឱ្យដឹងថា កម្លាំងទ័ពបានសហការជាមួយកម្លាំង ការិយាល័យនគរបាលបង្កានិងពន្លត់អគ្គិភ័យស្នងការខេត្តកណ្តាល និងស្ថាប័នពន្លត់អគ្គិភ័យជាច្រើនទៀតជាមួយអាជ្ញាធរមូលដ្ឋានបានចេញប្រតិបត្តិការពន្លត់អគ្គិភ័យ ដែលបានឆាបឆេះរោងចក្រស្បែកជើង ។
របាយការណ៍បន្តថា ខាងទ័ពមានកម្លាំងសរុបចំនួន ២៥ នាក់ (ស្រី១០នាក់) ប្រើរថយន្តសរុបចំនួន ៨ គ្រឿងរួមមាន១-រថយន្តម៉ាស្តាបញ្ជាការ ០៣ គ្រឿង,២-រថយន្តពន្លត់អគ្គិភ័យចំនួន០៤ គ្រឿង,៣-រថយន្តដឹកសម្ភារ:សង្រ្គោះចំនួន០១គ្រឿង ដោយបាមប្រើប្រាស់ទឺកសរុប ចំនួន ២៨ រថយន្ត ស្មើនឹង ២៤៨ ម៉ែត្រគូប ។
យ៉ាងណាក៏ដោយ មកដល់ពេលនេះសមត្ថកិច្ចជំនាញពុំទាន់ចេញរបាយការណ៍លម្អិតនៅឡើយ ។ បើតាមប្រភពបានឱ្យដឹងថា អគាររោងចក្រធំៗចំនួន៣អគារត្រូវបានភ្លើងឆេះទាំងស្រុង ។ កម្មកររាប់រយនាក់ ពុំបានចូលធ្វើការទៀតឡើយ ។
យោងតាមរបាយការណ៍ចុងក្រោយរបស់នគរបាលខេត្តកណ្តាលបានឱ្យដឹងថា អគាររោងចក្រចំនួន៣អគារដែលឆេះរួមមាន អគារទំហំ១០០ម៉ែត្រគុណនឹង២០០ម៉ែត្រចំនួន២អគារ និង អគារទំហំ១២០ម៉ែត្រគុណនឹង២០០ម៉ែត្រចំនួន១អគារ។ ចំពោះកម្មករ កម្មការិនី ពុំមានគ្រោះថ្នាក់ឡើយ ។ តែមិនបានបញ្ជាក់ពីមូលហេតុឡើយ ៕(ដោយ ៖ គា សំណាង+SAKARA)
