បរទេស ៖ អ្នករាយការណ៍ពិសេសរបស់អង្គការសហប្រជាជាតិប្រចាំប្រទេសមីយ៉ាន់ម៉ាបាននិយាយកាលពីថ្ងៃពុធទី២០ មីនាឆ្នាំ២០២៤ថា របបយោធាមីយ៉ាន់ម៉ាកំពុងប្រឈមមុខនឹង «ការគំរាមកំហែងអត្ថិភាព» ប៉ុន្តែពិភពលោកអាចជួយបញ្ចប់ការគ្រប់គ្រង «ដូចសុបិនអាក្រក់»របស់របបនេះជាមួយនឹងការដាក់ទណ្ឌកម្មរួមគ្នា។
លោក Tom Andrews បាននិយាយថា ការបាត់បង់ជីវិតដ៏ច្រើនក្នុងចំណោមកងកម្លាំងយោធា ក៏ដូចជាការរត់ចោលជួរ ការចុះចាញ់ និងការប្រឈមមុខនឹងការជ្រើសរើសទាហានថ្មី បាននាំឱ្យចំនួនកងទ័ពធ្លាក់ចុះ ដោយបង្កជា«ការគំរាមកំហែងដល់អត្ថិភាពសម្រាប់យោធាមីយ៉ាន់ម៉ា»។
លោកបាននិយាយថា «អ្នកដែលបានភ្នាល់លើរបបយោធាដើម្បីស្តារសណ្តាប់ធ្នាប់ និងស្ថិរភាពនៅក្នុងប្រទេសមីយ៉ាន់ម៉ា បានកំពុងភ្នាល់ចាញ់ហើយ»។
របបយោធាបានឡើងកាន់អំណាចក្នុងរដ្ឋប្រហារខែកុម្ភៈ ឆ្នាំ ២០២១ ដែលបានទម្លាក់រដ្ឋាភិបាលជាប់ឆ្នោតតាមបែបប្រជាធិបតេយ្យរបស់លោកស្រី អ៊ុងសាន ស៊ូជី ដោយបញ្ចប់ការពិសោធរយៈពេល ១០ ឆ្នាំជាមួយនឹងលទ្ធិប្រជាធិបតេយ្យ និងធ្វើឱ្យប្រជាជាតិអាស៊ីអាគ្នេយ៍មួយនេះធ្លាក់ចូលក្នុងភាពចលាចលយ៉ាងបង្ហូរឈាម។
របបយោធាកំពុងព្យាយាមយ៉ាងលំបាកដើម្បីបង្ក្រាបការតស៊ូចំពោះការគ្រប់គ្រងរបស់ខ្លួនពីសំណាក់ក្រុមឧទ្ទាមជនជាតិភាគតិចដែលបានបង្កើតឡើងជាយូរមកហើយ និងកម្លាំងការពារប្រជាជនដែលគាំទ្រលទ្ធិប្រជាធិបតេយ្យថ្មី។
លោក Andrews បាននិយាយថា «របបយោធាគឺជាកត្តាជំរុញចម្បងនៃអំពើហិង្សា អស្ថិរភាព ការធ្លាក់ចុះសេដ្ឋកិច្ចនិងភាពគ្មានច្បាប់នៅក្នុងប្រទេស»។
អតីតសមាជិកសភាអាមេរិករូបនេះគឺជាអ្នករាយការណ៍ពិសេសស្តីពីស្ថានភាពសិទ្ធិមនុស្សក្នុងប្រទេសមីយ៉ាន់ម៉ា។
អ្នករាយការណ៍ពិសេសត្រូវបានតែងតាំងដោយក្រុមប្រឹក្សាសិទ្ធិមនុស្សអង្គការសហប្រជាជាតិ ប៉ុន្តែជាអ្នកជំនាញឯករាជ្យដែលមិននិយាយសម្រាប់អង្គការសហប្រជាជាតិទេ។
លោក Andrews បាននិយាយថា «ទណ្ឌកម្ម ដូចជាការរឹតបន្តឹងលើលំហូរហិរញ្ញវត្ថុ និងឧបករណ៍សម្រាប់ការប្រើប្រាស់យោធា កំពុងរំខានដល់ប្រតិបត្តិការរបស់របបយោធា»៕(ប្រែសម្រួលដោយ លោកសំណាង)
