សេចក្តីសម្រេចនេះត្រូវបានធ្វើឡើងដោយតុលាការព្រហ្មទណ្ឌកណ្តាលសម្រាប់សំណុំរឿងពុករលួយ និងការប្រព្រឹត្តខុសវិន័យ កាលពីថ្ងៃពុធទី២០ មីនា ឆ្នាំ២០២៤ក្នុងការឆ្លើយតបទៅនឹងពាក្យបណ្តឹង ដែលប្តឹងដោយរដ្ឋអាជ្ញាប្រឆាំងនឹង ព្រះអាចាន់ខុម (Phra Ajarn Khom) ជាអតីតព្រះចៅអធិការវត្ត Pa Dhammakiri នៅស្រុកប៉ាក់ចុង (Pak Chong) និងអ្នកសមគំនិតប្រាំបីនាក់ទៀតជុំវិញការជាប់ពាក់ព័ន្ធរបស់ពួកគេក្នុងករណីនេះ។ អតីតចៅអធិការ ដែលឥឡូវមានឈ្មោះថា ខុម គង់កែវវ៉ា (Khom Kongkaeowas) គឺជាជនជាប់ចោទទីមួយ។
ចំណែកអ្នកប្រាំបីនាក់ទៀតគឺ Wutthima Thaomor ជាអតីតចៅអធិការវត្តមុនលោកខុម ប្អូនស្រីលោកខុមឈ្មោះ Juthathip Phubodiwarochuphan អ្នកបើកបររបស់គាត់ឈ្មោះ Boonyasak Patarakosol និង សង្ឃដែលគេចាប់ផ្សឹកប្រាំនាក់ទៀត ឈ្មោះ Boonsong Panpuwong, Bundit Yoicha, Nathapat Tangjaisanong, Boonluea Phothong និង Thanakrit Yotsurin។
តុលាការបានរកឃើញថា «លោកខុមបានឃុបឃិតជាមួយសង្ឃដែលគេចាប់ផ្សឹកទាំងប្រាំនាក់ដើម្បីកិបកេងបច្ច័យដែលវត្តទទួលបាន។គាត់បានទុកលុយក្នុងគណនីធនាគាររបស់គាត់ ដែលមានតែប្អូនស្រីរបស់គាត់ប៉ុណ្ណោះមានសិទ្ធិដកលុយចេញ។ លុយត្រូវបានដកចេញ ៧៦ ដង»។
អតីតចៅអធិការរូបនេះបានបង្គាប់ឱ្យប្អូនស្រីទុកលុយខ្លះនៅកុដិរបស់គាត់ ដែលក្រោយមកប៉ូលិសបានរឹបអូសបានចំនួន ៥១,៤ លានបាត។ លោកខុមក៏បានបង្គាប់ឱ្យអតីតសង្ឃដទៃទៀតឱ្យលាក់ទ្រព្យនៅក្រៅវត្តផងដែរ។
ក្រោយមកប៉ូលិសបានរកឃើញវត្ថុចំនួន ១.៤៥៥ រួមទាំងសាច់ប្រាក់សុទ្ធ និងទ្រព្យសកម្ម ដែលមានតម្លៃ ២៩៩,៥ បាត។ តុលាការបានរកឃើញគាត់មានកំហុសចំនួន ៧៨ ករណី ដោយករណីនីមួយៗត្រូវជាប់គុក ៦ ឆ្នាំ និងកាត់ឱ្យគាត់ជាប់គុកសរុប ៤៦៨ ឆ្នាំ។
Wutthima ត្រូវបានរកឃើញកំហុសលើ ៧៨ ករណីជាមួយនឹងទោសជាប់គុកសរុបចំនួន ៣១២ ឆ្នាំ។ Juthathip ត្រូវបានរកឃើញកំហុសចំនួន ៧៧ ករណីជាមួយនឹងទោសជាប់គុកសរុប ៣០៨ ឆ្នាំ។
ក្រោមច្បាប់ថៃ ទោសជាប់គុកអតិបរមាគឺ ៥០ ឆ្នាំ។ ទោសជាប់គុករបស់អ្នកសមគំនិតដទៃទៀតត្រូវបានបន្ថយពី៣ឆ្នាំមក២ឆ្នាំ ដោយសារពួកគេគ្រាន់តែចូលរួមសហការ។ ចំណែកនៅស្រុកខ្មែរយេីង អាចមានករណីស្រដៀងនេះទេ? ៕(ប្រែសម្រួលដោយ លោកសំណាង)