បរទេស ៖ ក្រុមអាជ្ញាធរបាននិយាយថា ខ្មាន់កាំភ្លើងបានបើកការបាញ់ប្រហារនៅសាលប្រគុំតន្ត្រីនៅទីក្រុងមូស្គូកាលពីថ្ងៃសុក្រ ទី២២ មីនា ឆ្នាំ២០២៤ដោយបានបណ្តាលឱ្យមនុស្សយ៉ាងតិច ៦០ នាក់បាត់បង់ជីវិត, របួស ១០០ នាក់និងបង្កឲ្យមានចលាចលយ៉ាងខ្លាំង ខណៈក្រុមរដ្ឋអ៊ីស្លាម«បានអះអាងទទួលខុសត្រូវ»។
យោងតាមអ្នកកាសែតរបស់ទីភ្នាក់ងារសារព័ត៌មាន RIA Novosti នៅកន្លែងកើតហេតុបានឱ្យដឹងថា អ្នកវាយប្រហារបានស្លៀកពាក់ឯកសណ្ឋានក្លែងបន្លំចូលទៅក្នុងអគារ បើកការបាញ់ប្រហារ និងគប់គ្រាប់បែកដៃ ឬគ្រាប់បែកភ្លើង។
អគ្គិភ័យបានរីករាលដាលយ៉ាងឆាប់រហ័សតាមសាលប្រគុំតន្ត្រី Crocus City នៅសង្កាត់ជាយក្រុង Krasnogorsk ភាគខាងជើងទីក្រុងមូស្គូ ខណៈដែលផ្សែងហុយពេញអគារ ហើយអ្នកទស្សនាប្រញាប់ប្រញាល់រត់រកច្រកចេញបន្ទាន់។
Alexei ដែលជាផលិតករតន្ត្រី ហៀបនឹងអង្គុយនៅកៅអីរបស់គាត់ទៅហើយ មុនពេលចាប់ផ្តើមការប្រគុំតន្ត្រីរ៉ុកនៅពេលដែលគាត់បានឮ «ផ្ទុះកាំភ្លើងយន្តជាច្រើន»និង «សំឡេងស្រែកយ៉ាងខ្លាំង»។
លោក Alexei ដែលមិនប្រាប់នាមត្រកូលរបស់គាត់ បាននិយាយថា «ខ្ញុំបានដឹងភ្លាមៗថាវាជាការបាញ់កាំភ្លើងស្វ័យប្រវត្តិ ហើយដឹងថាភាគច្រើនវាទំនងជាអំពើភេរវកម្មដ៏អាក្រក់បំផុត»។
លោកបានបន្ថែមថា នៅពេលដែលមនុស្សបានរត់ទៅរកច្រកអាសន្ននៅក្នុងសាលប្រគុំតន្ត្រី «មានការប៉ះទង្គិចដ៏គួរឱ្យភ័យខ្លាច» ដោយមានអ្នកចូលមើលប្រគុំតន្ត្រីបានរត់ជាន់ក្បាលគ្នាទៅវិញទៅមកដើម្បីរត់ចេញ។
គណៈកម្មាធិការស៊ើបអង្កេតបាននិយាយថា «សាកសពកំពុងត្រូវបានពិនិត្យ។ ជាបណ្តោះអាសន្ន មនុស្សជាង ៦០ នាក់បានបាត់បង់ជីវិតនៅក្នុងការវាយប្រហារ។ ជាអកុសលចំនួនជនរងគ្រោះអាចកើនឡើងច្រើនជាងនេះ»។
សេវាសន្តិសុខ FSB របស់រុស្ស៊ីបាននិយាយមុននេះថា យ៉ាងហោចណាស់មនុស្ស ៤០ នាក់បានបាត់បង់ជីវិត និងជាង១០០ នាក់ផ្សេងទៀតបានរងរបួស ។ នេះបើយោងតាមរបាយការណ៍របស់ប្រព័ន្ធផ្សព្វផ្សាយរុស្ស៊ី។
អាជ្ញាធរបាននិយាយថា ការស៊ើបអង្កេត «ភេរវករ» ត្រូវបានចាប់ផ្តើម ហើយប្រធានាធិបតី វ្ល៉ាឌីមៀ ពូទីន កំពុងទទួលបានព័ត៌មានថ្មីៗ «ឥតឈប់ឈរ»។ នេះបើយោងតាមអ្នកនាំពាក្យរបស់គាត់ លោក Dmitry Peskov បានប្រាប់ទៅទីភ្នាក់ងារសារព័ត៌មានរុស្ស៊ី។
ឆ្មាំជាតិរុស្ស៊ីបាននិយាយថា ខ្លួនស្ថិតនៅកន្លែងកើតហេតុ និងស្វែងរកជនដៃដល់។ អ្នកយកព័ត៌មាន AFP ម្នាក់បានឃើញមន្ត្រីប៉ូលិស ដែលមានឆ្កែហិតក្លិន កំពុងពិនិត្យរថយន្តដែលចតនៅក្បែរអគារ។
ក្រុមរដ្ឋអ៊ីស្លាមបាននិយាយថា ក្រុមយុទ្ធជនរបស់ខ្លួនបានវាយប្រហារ «ការប្រមូលផ្តុំដ៏ធំ»នៅជាយក្រុងមូស្គូ និង«ដកថយទៅមូលដ្ឋានរបស់ពួកគេដោយសុវត្ថិភាព»៕(ប្រែសម្រួលដោយ លោកសំណាង)
