ភ្នំពេញ ៖ យុវជនម្នាក់បានបាត់បង់ជីវិតភ្លាមៗ ខណៈជិះម៉ូតូ ត្រូវបានរថយន្តកុងតឺន័រ បុកហេីយកិនបណ្ដាលឲ្យស្លាប់ភ្លាមៗ កាលពីវេលាម៉ោងប្រមាណ៩យប់ ថ្ងៃទី២៨ ខែមីនា ឆ្នាំ២០២៤ ស្ថិតតាមបណ្ដោយផ្លូវហាណូយ សង្កាត់ទឹកថ្លា ខណ្ឌសែនសុខ រាជធានីភ្នំពេញ ជិតស្ពានអាកាសផ្សារដីហុយ ។
ជនរងគ្រោះមានឈ្មោះ វ៉ានឆវឌ្ឍនា ភេទប្រុស អាយុ៣០ឆ្នាំ រស់នៅផ្ទះលេខ៤ ផ្លូវ៥២៨ ក្នុងភូមិ២ សង្កាត់បឹងកក់ទី១ ខណ្ឌទួលគោក រាជធានីភ្នំពេញ ជិម៉ូតូម៉ាក Honda Wave ពាក់ស្លាកលេខភ្នំពេញ 1CC-3635 ឯរថយន្តបង្កជាប្រភេទរថយន្តកុងតឺន័រ ពាក់ស្លាកលេខត្បូងឃ្មុំ 3A-1361 ។
ប្រភពព័ត៌មានបានឱ្យដឹងថា មុនពេលកើតហេតុ ជនរងគ្រោះជិះម៉ូតូម្នាក់ឯង តាមបណ្ដោយផ្លូវភ្នំពេញហានណូយ ហើយរថយន្តធ្វើដំណើរស្របទិសគ្នា ពីជើងទៅត្បូង លុះមកដល់ចំណុចកើតហេតុ មិនដឹងជាយ៉ាងម៉េច ស្រាប់តែរថយន្តជ្រុលប៉ះកៀរម៉ូតូ រួចកិនអ្នកបើកបរម៉ូតូតែម្ដង ។ ភ្លាមៗអ្នកបើកបររថយន្តចុះរត់បាត់ បន្សល់រថយន្តនិងបុរសម្នាក់ជាព្រូឡាន ។
ក្រោយកេីតហេតុសមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញធ្វេីការវាស់វែងយករថយន្តនិងម៉ូតូរក្សាទុក រីឯសពត្រូវបានសមត្ថកិច្ចប្រគល់ឲ្យគ្រួសារយកទៅធ្វេីបុណ្យទៅតាមប្រពៃណី ៕ BBN07