បរទេស ៖ អាជ្ញាធរបាននិយាយកាលពីថ្ងៃព្រហស្បតិ៍ទី២៨មីនាឆ្នាំ២០២៤ថា មនុស្សចំនួន ៤៥ នាក់បានបាត់បង់ជីវិតនៅក្នុងប្រទេសអាហ្រ្វិកខាងត្បូង បន្ទាប់ពីរថយន្តក្រុង ដែលពួកគេជិះ បានធ្លាក់ពីស្ពានកម្ពស់ ៥០ ម៉ែត្រចូលទៅក្នុងជ្រោះជ្រៅមួយ។
មានកុមារីអាយុ ៨ឆ្នាំម្នាក់ដែលនៅរស់រានមានជីវិតតែម្នាក់គត់ ត្រូវបានបញ្ជូនទៅមន្ទីរពេទ្យជាមួយនឹងរបួសធ្ងន់ធ្ងរ។ឡានក្រុងបានបុករបាំងថ្ម ហើយបានឆាបឆេះពេលបុកនឹងដីនៅក្នុងខេត្ត Limpopo ភាគឦសាន។
អ្នកដំណើរទាំងនោះជាអ្នកធ្វើធម្មយាត្រា ដែលធ្វើដំណើរពីរដ្ឋធានី Gaborone នៃប្រទេសបុតស្វាណាទៅកាន់សេវាបុណ្យ Easter ក្នុងទីក្រុង Moria។
រថយន្តក្រុងបានបាត់បង់ម្ចាស់ការ ហើយបានធ្លាក់ពីលើស្ពាននៅលើផ្លូវឆ្លងកាត់ភ្នំ Mmamatlakala រវាងតំបន់Mokopane និងតំបន់ Marken ស្ថិតនៅចម្ងាយប្រហែល ៣០០ គីឡូម៉ែត្រពីភាគខាងជើងទីក្រុង Johannesburg ។ នេះបើយោងតាមការផ្សាយរបស់ទូរទស្សន៍សាធារណៈអាហ្រ្វិកខាងត្បូង SABC ។
កិច្ចប្រតិបត្តិការជួយសង្គ្រោះបានបន្តរហូតដល់យប់ជ្រៅថ្ងៃព្រហស្បតិ៍ ដោយអ្នកបាត់បង់ជីវិតខ្លះត្រូវបានគេរាយការណ៍ថាពិបាកចូលទៅដោយសារតែកម្ទេចកម្ទី។
លោកស្រី Sindisiwe Chikunga រដ្ឋមន្ត្រីក្រសួងដឹកជញ្ជូនដែលបានទៅកន្លែងកើតហេតុនៃឧបទ្ទវហេតុនោះ បាន«ចូលរួមរំលែកទុក្ខដ៏ក្រៀមក្រំដល់គ្រួសារដែលរងគ្រោះដោយសោកនាដកម្មធ្លាក់ឡានក្រុងចូលជ្រោះ»។
លោកស្រីបាននិយាយថា រដ្ឋាភិបាលអាហ្រ្វិកខាងត្បូងនឹងជួយធ្វើមាតុភូមិនិវត្តន៍សាកសព និងធ្វើការស៊ើបអង្កេតពេញលេញលើមូលហេតុនៃគ្រោះថ្នាក់នេះ៕(ប្រែសម្រួលដោយ លោកសំណាង)
