រុស្ស៊ី ៖ មន្ត្រីរុស្ស៊ីបាននិយាយកាលពីថ្ងៃសុក្រ ទី២៩ ខែមីនាឆ្នាំ២០២៤ ថា ពួកគេបានចាប់ខ្លួនមនុស្សបីនាក់ ដែលរៀបចំផែនការវាយប្រហារនៅភាគខាងត្បូងប្រទេស ពោលគឺមួយសប្តាហ៍បន្ទាប់ពីការវាយលុកលើសាលប្រគុំតន្ត្រីនៅទីក្រុងមូស្គូបណ្តាលឱ្យមនុស្សយ៉ាងហោចណាស់ ១៤៤ នាក់បាត់បង់ជីវិត។
ទីភ្នាក់ងារសារព័ត៌មានរុស្ស៊ីបានរាយការណ៍ថា ទីភ្នាក់ងារសន្តិសុខ FSB បាននិយាយថា ខ្លួនបាន «បញ្ចប់សកម្មភាពភេរវកររបស់មនុស្សបីនាក់មកពីប្រទេសអាស៊ីកណ្តាលមួយ»។
ជនសង្ស័យទាំងបីនាក់មានគម្រោងប្រព្រឹត្តអំពើភេរវកម្មដោយបំផ្ទុះឧបករណ៍នៅកន្លែងសាធារណៈក្នុងតំបន់Stavropol។
ទូរទស្សន៍រុស្ស៊ីបានបង្ហាញរូបភាពបុរសទាំងនោះត្រូវបានភ្នាក់ងារ FSB ចាប់ផ្តួលលើដី។
ទីភ្នាក់ងារសារព័ត៌មាន RIA Novosti បាននិយាយថា គ្រឿងផ្សំសម្រាប់ឧបករណ៍បំផ្ទុះ (IED) និងសារធាតុគីមី ត្រូវបានរកឃើញនៅផ្ទះរបស់ជនសង្ស័យម្នាក់ក្នុងចំណោមជនសង្ស័យទាំងបីនាក់។
Stavropol ស្ថិតនៅក្នុងតំបន់ North Caucasus នៃភាគខាងត្បូងប្រទេសរុស្ស៊ីដែលមានព្រំប្រទល់ជាប់នឹងតំបន់Dagestan និង Chechnya ក្នុងចំណោមតំបន់ផ្សេងទៀត។
ការប្រកាសនេះបានធ្វើឡើងមួយសប្តាហ៍បន្ទាប់ពីការសម្លាប់រង្គាលនៅឯសាលប្រគុំតន្ត្រី Crocus City នៅជាយក្រុងមូស្គូ ដែលបានឆក់យកជីវិតមនុស្សយ៉ាងហោចណាស់ ១៤៤ នាក់៕(ប្រែសម្រួលដោយ លោកសំណាង)
