បរទេស ៖ ស្ថាប័នសិទ្ធិមនុស្សឈានមុខគេរបស់អង្គការសហប្រជាជាតិបានយល់ព្រមកាលពីថ្ងៃព្រហស្បតិ៍ ទី៤មេសាឆ្នាំ២០២៤លើវិធានការនានាក្នុងគោលបំណងដាក់សម្ពាធលើប្រទេសមីយ៉ាន់ម៉ា និងអ៊ីរ៉ង់ ដែលរដ្ឋាភិបាលរបស់ពួកគេត្រូវបានចោទថា«ប្រើប្រាស់អំពើហិង្សាលើប្រជាជនរបស់ខ្លួន»។
ក្រុមប្រឹក្សាសិទ្ធិមនុស្សគឺបង្កើតឡើងដោយប្រទេសសមាជិកចំនួន ៤៧ ដែលគាំទ្រដោយការមូលមតិគ្នាជាវិធានការមួយដែលអំពាវនាវឱ្យរដ្ឋាភិបាលនានាបញ្ចៀសការនាំចេញ ឬលក់ប្រេងឥន្ធនៈយន្តហោះទៅប្រទេសមីយ៉ាន់ម៉ាប្រសិនបើពួកគេជឿថារបបយោធាដែលកំពុងកាន់អំណាចនេះអាចប្រើប្រាស់ប្រេងឥន្ធនៈដើម្បីរំលោភសិទ្ធិមនុស្សប្រទេសអាស៊ីអាគ្នេយ៍ហែកហួរដោយសង្រ្គាមមួយនេះ។
ក្រុមប្រឹក្សានេះក៏បានជំរុញឱ្យបញ្ឈប់ការផ្ទេរអាវុធ គ្រាប់កាំភ្លើង និងឧបករណ៍យោធាផ្សេងទៀតដោយខុសច្បាប់ទៅកាន់ប្រទេសមីយ៉ាន់ម៉ាផងដែរ។
អ្នកជំនាញឯករាជ្យដែលឧបត្ថម្ភដោយក្រុមប្រឹក្សានេះបានព្រមានកាលពីខែមុនថា រដ្ឋាភិបាលយោធាមីយ៉ាន់ម៉ាកំពុងបង្កើនអំពើហិង្សាលើជនស៊ីវិល ខណៈដែលខ្លួនប្រឈមមុខនឹងឧបសគ្គបន្ថែមទៀតនៅលើសមរភូមិប្រឆាំងនឹងក្រុមគាំទ្រលទ្ធិប្រជាធិបតេយ្យ និងក្រុមប្រដាប់អាវុធជនជាតិភាគតិច។
យោធាបានដណ្តើមអំណាចកាលពីជាងបីឆ្នាំមុនពីរដ្ឋាភិបាលជាប់ឆ្នោតរបស់លោកស្រីអ៊ុងសាន ស៊ូជី ដែលបង្កឱ្យមានក្រុមប្រឆាំងអហិង្សារីករាលដាល ដែលត្រូវបានជួបជាមួយនឹងកម្លាំងបង្ក្រាបដ៏សាហាវ។ ការគាបសង្កត់នេះបានបង្កើតឱ្យមានការតស៊ូប្រដាប់អាវុធ និងធ្វើឱ្យប្រទេសនេះធ្លាក់ក្នុងភ្លើងសង្គ្រាមស៊ីវិល៕(ប្រែសម្រួលដោយ លោកសំណាង)