កោះតៃវ៉ាន់ ៖ ចំនួនអ្នករងរបួសក្នុងគ្រោះរញ្ជួយដីកម្រិត ៧,២ រិច្ឆទ័រ នៅភាគខាងកើតកោះតៃវ៉ាន់ បានកើនឡើងលើស ១ពាន់នាក់ កាលពីថ្ងៃព្រហស្បតិ៍ ទី៤ មេសាម្សិលមិញ ទោះបីជាចំនួនអ្នកស្លាប់នៅទ្រឹងត្រឹម ៩ នាក់ក្តី ខណៈបុគ្គលិក ៤២នាក់ ដែលកំពុងធ្វើដំណើរទៅកាន់សណ្ឋាគារមួយក្នុងឧទ្យានជាតិមួយ នៅតែបាត់ខ្លួន។
រញ្ជួយដីដែលខ្លាំងបំផុតក្នុងរយៈពេល ២៥ ឆ្នាំ បានវាយប្រហារកាលពីព្រឹកថ្ងៃពុធ ខណៈដែលមនុស្សកំពុងត្រៀមខ្លួនទៅធ្វើការ និងសាលារៀន ហើយរញ្ជួយដីនេះបានកើតឡើងភាគច្រើននៅតំបន់ជនបទភាគខាងកើត និងមិនសូវមានប្រជាជននៃស្រុក Hualien ។អគារនានាក៏បានអង្រួនយ៉ាងខ្លាំងផងដែរនៅក្នុងរដ្ឋធានីតៃប៉ិ ប៉ុន្តែការខូចខាត និងការរំខានមានតិចតួចបំផុត។
នាយកដ្ឋានពន្លត់អគ្គិភ័យរបស់កោះតៃវ៉ាន់បាននិយាយថា ចំនួនអ្នករបួសបានកើនឡើងដល់ ១.០៣៨ នាក់ ហើយបានធ្វើឱ្យចំនួនអ្នកបាត់ខ្លួនសរុបកើនដល់ចំនួន ៤៨ នាក់ រួមទាំងបុគ្គលិកសណ្ឋាគារចំនួន ៤២ នាក់។
កាលពីល្ងាចថ្ងៃពុធ មជ្ឈមណ្ឌលបញ្ជាការគ្រប់គ្រងគ្រោះមហន្តរាយបាននិយាយថា ការស្វែងរកបុគ្គលិកសណ្ឋាគារដែលកំពុងធ្វើដំណើរទៅកាន់ឧទ្យានជាតិ Taroko Gorge គឺជាការផ្តោតសំខាន់សម្រាប់ពួកគេ។ អាជ្ញាធរគ្រោងនឹងបញ្ជូនដ្រូន និងឧទ្ធម្ភាគចក្រ ដើម្បីស្វែងរកពួកគេ ហើយទម្លាក់ការផ្គត់ផ្គង់ ប្រសិនបើពួកគេស្ថិតនៅទីនោះ។
ចំណែកអ្នកផ្សេងទៀត ដែលជាប់គាំង កំពុងត្រូវបានរកឃើញជាបណ្តើរៗហើយនាំទៅទីសុវត្ថិភាព។ នាយកដ្ឋានពន្លត់អគ្គិភ័យបាននិយាយថា កាលពីថ្ងៃព្រហស្បតិ៍ ឧទ្ធម្ភាគចក្រមួយគ្រឿងបានជួយសង្គ្រោះមនុស្សចំនួន ៦ នាក់ ដែលបានជាប់នៅក្នុងតំបន់រុករករ៉ែ៕(ប្រែសម្រួលដោយ លោកសំណាង)