បរទេស ៖ ក្រុមសកម្មប្រយុទ្ធប៉ាឡេស្ទីន និងក្រុមគ្រួសារលោក Ismail Haniyeh បាននិយាយថា កូនប្រុសបីនាក់របស់មេដឹកនាំក្រុមហាម៉ាស់ លោក Ismail Haniyeh ត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែល នៅតំបន់ហ្គាហ្សាស្ទ្រីប កាលពីថ្ងៃពុធ ទី១០ មេសាឆ្នាំ២០២៤ ។
យោធាអ៊ីស្រាអែលបានបញ្ជាក់ថា បានធ្វើការវាយប្រហារនេះ ដោយពណ៌នាកូនប្រុសទាំងបីថា «ជាអ្នកប្រតិបត្តិក្នុងក្រុមប្រដាប់អាវុធហាម៉ាស់»។
ហាម៉ាស់បាននិយាយថា កូនប្រុសទាំងបីនាក់គឺ Hazem, Amir និង Mohammad ត្រូវបានសម្លាប់នៅពេលដែលរថយន្តដែលពួកគេកំពុងបើកបរត្រូវបានបំផ្ទុះនៅក្នុងជំរំ Al-Shati របស់ហ្គាហ្សា។ ក្រុមហាម៉ាសបាននិយាយថា«ចៅៗ៤នាក់របស់លោក Haniyeh មានស្រី ៣ នាក់ និងប្រុសម្នាក់ ក៏ត្រូវបានសម្លាប់នៅក្នុងការវាយប្រហារនេះដែរ»។
នៅពេលសួរអំពីចៅទាំងបួននាក់ដែលត្រូវបានសម្លាប់ក្នុងការវាយប្រហារតាមអាកាស យោធាអ៊ីស្រាអែលបាននិយាយថា «មិនមានព័ត៌មានអំពីរឿងនោះនៅពេលនេះទេ»។
លោក Haniyeh ដែលមានមូលដ្ឋាននៅបរទេសក្នុងប្រទេសកាតា គឺជាមុខមាត់ដ៏ស្វិតស្វាញនៃផ្នែកការទូតអន្តរជាតិរបស់ក្រុមហាម៉ាស់ ខណៈដែលសង្រ្គាមជាមួយអ៊ីស្រាអែលបានផ្ទុះឡើងនៅតំបន់ហ្គាហ្សា ជាកន្លែងដែលផ្ទះគ្រួសាររបស់គាត់ត្រូវបានបំផ្លាញនៅក្នុងការវាយប្រហារតាមអាកាសរបស់អ៊ីស្រាអែលកាលពីខែវិច្ឆិកា។
លោក Haniyeh អាយុ ៦១ ឆ្នាំដែលមានកូនប្រុសស្រីចំនួន ១៣ នាក់ បានប្រាប់ទូរទស្សន៍ Pan-Arab Al Jazeera TV ថា «ឈាមរបស់កូនប្រុសរបស់ខ្ញុំមិនគួរឱ្យស្រឡាញ់ជាងឈាមរបស់ប្រជាជនរបស់យើងនោះទេ»។
យោងតាមសាច់ញាតិបានឱ្យដឹងថា កូនប្រុសទាំងបី និងចៅបួននាក់បានទៅលេងគ្រួសារក្នុងថ្ងៃដំបូងនៃពិធីបុណ្យ Eid al-Fitr របស់មូស្លីមនៅ Shati ដែលជាជំរំជនភៀសខ្លួនក្នុងស្រុកកំណើតរបស់ពួកគេក្នុងទីក្រុងហ្គាហ្សា៕(ប្រែសម្រួលដោយ លោកសំណាង)